المساعد الشخصي الرقمي

مشاهدة النسخة كاملة : ماكياج مثبت للبشره الدهنية


محد شرااتي
23-10-2011, 10:32
مساءكم فل وياسمين


شحالكن صبايا عساكن بخير



ياليت القى حل عندكم لاني تعبت من هالبشره

بشرتي دهنية وبما اني موظفه ابغي تغطيه حلوه ومادهن بعد جمن ساعه


قبل فتره كنت استخدم كريم اساس ماكس فاكتر الي يجي شرات الموس (كريمي) والبودره الذهبيه تبعها

كريم اساس موليه ماناسبني طلعلي حبوب وخرب ويهي

وجربت الموس من مبلين وبرستيج


والحين صارلي فتره استخدم مرطب طبي وعقب كريم اساس رفلون <-- حلو لانه بسرعه يجف ع البشره وموب كريمي



واحطي فوقه بودره ديبورا بس مشكله بعد جمن ساعه يدهن ويهي والله يفشل ويبهت




من اسبوع ببرنامج جويل لما كانت مستضيفه كيم سالت خبيره التجميل انها ماتحطي برايمر ( اعتقد هالشي ) وذمته انه يتكتل


طيب شو نحطي عسب يثبت المكياج



بنات ادري موضوعي مب مرتب بس خاطري ببشره مخمليه

للنهار وحلوة تكون يعني احطي برايمر ولا في شي ثاني


يعطيكم العافيه ^^

انومة
24-10-2011, 11:00
هو ببرانمج جويل مع كيم قالت تحط شي علشان الوجة مايلمع ولا يدهن برضو انا ابي اعرفة عجبني صراحة

Artos ~
25-10-2011, 01:07
صَدق من قال إن الحَريم يتأثرون بالدَعاية وَ الإعلآن
يَنقال كيم كآردشيان هي إللي تَمكيج عُمرهآ الآن !! ,,

يَعني ما أدري وَش هالمَنطق إللي تستندون عليه عَشان خَبيرة قالت لا أنا ما بَستخدم وَ لا كيم طَلعت وَ قالت خلاص يَعني صَح
البرامج مَكفوله بالإعلانات إللي تَدعم البرنامج , زَمان كان الرآعي ميك أب فورإيفر فَقعت الناس بميك آب فورإيفر

لو الرآعي صار ماكس فآكتور بَتمجد بمآكس فآكتور , متى بَتفهمون شيء أسمه دَعاية وَ إعلان
وَ شركات رآعية !!

بالنسبة لمُشكلتك أكيد لازم تستخدمين بيس / بريمر كَلهم مُسمى وآحد
وَهذا فايدته مَو عشان يَصير مَكياجك حَلو وَبس , مُفيد لآجل يَحمي بَشرتك من الآساس نَفسه
وَ غالباً مايكون مُغذي

يَعني بَشرتك دُهنيه = مما يَعني أنها كَثيرة المَسامات بالتآلي
بتَروحين دوآم وَ كل هالفترة بَشرتك مُغطسه بالأساس بتختنق , فأكيد مُهم وَجود بيس أو بريمر

حتى ما أفضل تَستخدمين أساس إلا إذا بَشرتك تعبانة جداً
أو وَظيفتك تتطلب ظَهور وَ كاريزمآ وَ طلة , يَعني عَملك يَعتمد على جَمآلك بالدَرجة الآولى قبل آدائك الوَظيفي

عُموماً ماركة ديبورآ ماركة أنسحبت من الأسواق عندنآ بالرياض
لسوء المآتيريال وَ مازالت على ما أعتقد تُباع بالأكشاك لكن أنها آنسحبت

دامك مَوظفة لآزم شَوي تتكلفين بالعنآية ببشرتك , قبل المَيك آب
مَكياج خَيالي يَعني إما يَد خَبيرة وَ مبدعة بإظهار المَيك آب , أو بَشرة خيالية

تبين شيء أقتصادي وَ سَعره حَلو , رَوحي ماك

وَخذي لك مُثبت ماكياج مَيزته يَعطي طَراوة للوجه وَ بنفس الوقت يَثبت مآكياجك , إذا منب غلطانة يَحتوي على فيتآمين مو متأكدة ومآفيني أطل على العَلبة إللي عنَدي <--------- كَسل

شَوفي هالرَيفيو رآح يَفيدك
أضغَطي هُنا (http://www.shamoa.com/vb/showthread.php?t=49526)

بَعدهآ خذي آساس خَفيف
[ وَ أقصد خَفيف ذو تَغطية خَفيفه وَ مُناسب لَبشرتك ]

يُكتفى باللوس بآودر , لأن أشوف حرآم بَدوآم يُستخدم كومباكت فآونديشن بآودر يَخنق البَشرة

وَ الأهم الاهتمآم بتنظيف البَشرة , خَطوات سَهله يآلغلآ
مايحتاج كَل هالعناء , رَوتين يَومي لمآكياجك وَ روتين يَومي لتَنظيف البشرة من هالمَيك آب وَ يليه برنآمج مُتناسب للعناية ببشرتك

بالنسبة للبريمر أو البيس , شَوفي إستي لودر , شانيل , لو ماتبين من هالمآركات عندك بوبي برآون بيس مغذي بالفيتامين , أو سماش بوكس بيس قابض للدهون هو وَ ميك أب فورإيفر

وَ إللي مَثل كيم كآردشيان مايحتاجون برايمر لأن الأساس طَبقات طَبقات

أتمنى آكون آفدتك

دُمتم بَحب

مُلاحظه ~

تُمنع حركآت الرَفع بَشموآه up وَ آآآب
وَ للرفع , تَم حذف ردك الخآص بالرَفع
لو أي أحد عنده خَلفيه رآح يَرد , مآراح نَقصر ,,

محد شرااتي
25-10-2011, 09:07
Artos ~

حرااام عليج قطعتيني لووووووووووووول

بس والله رمستج عسل ربي لايحرمنا من هالنصايح الحلوة

فعلا دوامي يطلب اكون بمظهر حلوو واصلا وايد احب اكشخ ولاني بشرتي حنطيه احب افتحها بدرجه


للاسف بالمكياج لا اني مبدعه ولا هم يحزنون

فاونديشن وبودره وكحل وقلوس يعني وااايد سمبل <--- احب الشي الخفيف مره

الي مخرب عليه مكياجي الحمدلله بشرتي مافيها عيوب غير المسامات

وكل يوم انظفها ميلك وتونر ومرات اسوي ماسك وتقشير

طيب بعد البرايمر هو نفسه مثبت المكياج الي طريتيه من ماك ؟؟؟شو تنصحيني بكريم اساس خفيف ولوس باودر ؟؟؟

اذا ماتفضلين اني استخدم الاساس شو بديله في حاله استغنيت عنه ؟؟؟

عسب تطلع بشرتي حلوه ؟؟؟ لان مايعجبني الكومباكت روحه احس مممم مايطلع نظيف غير يوم فاونديشن وبودره ^^


وبودره ديبورا والله مادري عنها عندنا يديده ومن فتره فاتحينها بسنتر بوينت

بس شو رايج باساس رفلون ماعلقتي لووووووووول

رابط الفيديو للاسف مايفج


سمحيلي غثيتج باسالتي بس محتاجه حد ينصحني ويعلمني

لان جد خاطري مكياجي يكون نظيف وحلو


تسلمين حبوبه ^^

chica en el amor
26-10-2011, 09:50
مرحبا ،،

انا بشرتي دهنية وَ باقول لك كم فكرة أنا أسويهم وَ إن شالله تفيدك ،،

أول شي طبعا نظفي بشرتك زيــــــن وَ رطبيها كل يوم بمرطب مناسب ،،
بعدين نجي للميك اب ،،

البرايمر أنا أشوفه مهم وَ فرق كبير لما استخدمه ،
فيه من بينيفت وَ فيه من جيفنشي وَ فيه من ميك اب فور ايفر ،،


chica's reviews #1 || all mat primer (http://www.shamoa.com/vb/showthread.php?t=31718)



الفاونديشن وَ الباودر ،، وَ لو للدوام تقدرين بس تستخدمين بودرة مثل mac mineralized skin finish natural

بعد الفاونديشن والبودرة فيه بخاخ يثبت الميك اب وَ يخليه مات طول اليوم ،،
من ايربن ديكاي ( سيفورا - دبي مول )



http://3.bp.blogspot.com/_olhiYVOMcGc/S-qi51ObN_I/AAAAAAAADLk/6BBrXV5iVUE/s400/UDdeslickspray.jpg (http://3.bp.blogspot.com/_olhiYVOMcGc/S-qi51ObN_I/AAAAAAAADLk/6BBrXV5iVUE/s1600/UDdeslickspray.jpg)

وَ أخيرا ،، بالدوام تقدرين تخففين من الدهون بهالطريقة البسيطة :


cheap & homemade || لصاحبات البشرة الدهنية , حل سريع ورخيص ! (http://www.shamoa.com/vb/showthread.php?t=39412)


إن شالله أكون أفدتك وَ لا تيأسين

:1rose: