الرئيسية الألعاب التَسجيل القوانين إتصل بَنا Twitter Facebook
 
العودة   منتديات شمواه|SHAMOA FORUM ® > ،، || لغة الجَمال || ،، > عطورها bath & body

الملاحظات

عطورها bath & body يلقي الضوء على جديد العطور , ومستلزمات الحمام , وطرق العنايه الشخصيه .



إضافة رد
 
أدوات الموضوع
قديم 09-07-2010   #1

مس~قدها وقدوود
« نائبة الإدارة »
« مُشرفة هُموم وطن + أحدَاث عَلى السطح »
 

رحمتك يارب ..
 
الصورة الرمزية مس~قدها وقدوود

مس~قدها وقدوود غير متواجد حالياً

 رقم العضوية : 4
 تاريخ التسجيل : 06 2008
 الجنس : sex
 المكان : الرياض
 المشاركات : 6,577
 تقييمك لشمواهـ : 1
  الشعبيه : مس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـ
 النقاط : 225376
 مجموع الاوسمة 23

أُوْسْكَار أقوى حَضور 

Ico قصتــي مع العطـــور ~ قد لاتٌشبهها قصــة






















قصتي مع العطور قصة طويلة .. وجميلة .. مليانة ذكريات ...


ومتأكدة أنكم راح تصدقون لما تخلصون من قراءة الموضوع ,, انها

قصة } لاتشبهها أي قصة ~












حباني الله بعشق لايوصف .. للروائح الزكية .. ماأتذكر متى بدا عشقي

لها .. لأنة بدا مبكر جداً . وفي زمن صعب .. يختلف كثير عن زمننا

الحين ..

الموضوع طويل .. لكن ان شاء الله مايكون ممل .,,




من أول ماوعيت على الدنيا ..وقبل مراحل الأنوثة وتوابعها

هع ~

بدت العطور بقواريرها الضخمة .. والثقيلة تلفت نظري ..

{ لاحظو ماقلت روائحها لسة }

كان يمكن عمري 5 او 6 سنوات .. لما كنت اتسلل لغرفة

زوجة ابوي .. العروس الجديدة ..هههههههههههههههههه

لما تطلع وتتركها مفتوحة .. كنت ادخل اتسحب ..واوقف قدام

تسريحتها .. كانت مليااااااااااانة .بمجموعه كبيرة من العطور

{ في زمن غابر .. كانت العروس اللي ماتشتري طقم من كل عطر

وتصفهم على تسريحتها .. بالتدرج .. كبير اصغر اصغر الجميع ~

ماكانت تعتبر عروس .. والمشكلة ان هي هي العطور اللي في

السوق ..يعني انتي وعرايس جيرانكم والحي كلة نفس العطور

كنة محلوف عليهم ... بس بالفعل ماكان فية شركات كثيرة

ولا خيارات متعددة من العطور مثل الحين ..

كان اشهرها ابو طير









وهذا .. وكلهم من برجوا ~







ههههههه

ياحبي لهم اهلنا ..يسمون العطور باسماء غريبة عشان يعرفونها ..



المهم


كان الوقت يسرقني وانا بس اطالع واتمقل في القوارير


والمسها ... طبعا مااقدر افتحها اخاف تنكب علي


لأن العطور من اول مافية بخاخ .. افتح وكب ..ههههههههههه



وشوي شوي ... بدا يكبر عشقي .. ويوم وصلت


سن ال10 سنوات ... كانت اختي الكبيرة تجهز


لزواجها ... وسرى عليها ماسرى على غيرها ... ههههههههههه


مع انة وقتها طلع حركات واسماء مختلفة ..وبدو الناس يخفون


شوي عن سالفة الطقم من كل عطر .. بس لأن اللي يجهز لها


هو الوالد اللي يطول عمرة .


فما اقتنع انها تاخذ قارورة وحدة من كل عطر ..يقول عيب


عاد رحت معها ومعنا ابوي لسوق سويقة القديمة ..


ومخضرمات الرياض اكيد يعرفونة .. كان هو السوق الراقي


وقتها ...قبل تفتح المولات ..


ودخلنا المحل .. وهي راحت للمكياج وقامت تخم منة


(خذت راحتها لأن ابوي كان يعيها تحط مكياج قبل العرس يقول عيب )


كلش عيب جعل عمرة طويل ..


وابوي وانا وقفنا عند طاولة العطور .. عاد انا كنت قصيرونة والطاولة


عالية علي .. وبس اطلطل وارفع جسمي عشان


اشوف العطور .. لين سحبت كرتون مدري وش حقة جنبي ورقيت


علية .. وابوي مايدري وش الروايح .. (الوالد فاقد حاسة الشم )


ههههههه مدري لية رايح يشتري عطور


واحرجة الرجال يبخ بالمنديل يقول شم شم وابوي يقول



هها بس بكم هو بة ؟؟ لين قالة سعر غالي قال هات طقم


(على بالة الغالي هو اللي ريحتة زينة ) .. مايدري ان اختي


مااستعملت الا واحد بس ... زاد لقافتها يوم تروح للمكياج وتخلية


بلحالة ..


وقتها اصريت علية يشتري لي عطر .. وقلت ماابي انت تختار


انا ابي اشم ... وهو ودة يزنطني ..


وفعلا ..تم مرادي .. واخترت اول عطر في حياتي ...


بس يحلفون اني شاريتة عشان شكلة بس ... ولا الريحة


بس بعد فترة اتصادر مني ...
يقولون خنقتينا من كثر ماتبخينة

بس عوضوني بدالة بعطر كان منتشر وقتها ... وهو انايس انايس ...


من كاشاريل ... وهو اول عطر تصدرة كاشاريل ..تقريبا كان بالسوق


من اكثر من 40سنة ... قبل انولد ب39 سنة يعني










بعدها .. امتلكت اول عطر حقيقي ..


شريتة بمصروفي .. كان توة نازل .. وانا كنت بسن ال12 تقريبا


وكان اول بداية لي في عالم جمع العطور ..


وهو عطر باريس القديم .. من سان لوران ..




وبعدها بوقت قصير .. شميت في وحدة عطر .. كانت بزر اصغر مني


.. واناديها للحوش وامسكها تحقيق


وشو العطر اللي انتي حاطتة ..؟؟ تقول مدري هذا طيب حق امي


حطت لياة ...


قلت طيب وشلون شكلة .؟؟


قالت مدور ..(يقطع ام الوصف الدقيق )


وانا مصرة ومحجرة لها بالزاوية .. قلت طيب وشلون قارورتة


قالت ..مدري .. يوم طيرت عيوني شوي ..قالت هاة اثود


(اسود ) همن قالت لا لا .. زي البيدجان ..


(هنا سر حبي للبيتنقان ) ... قلت اسود ولا بنفسجي ؟؟؟


قالت ( اثود بنفسدي ) ... هنا بغيت اتوطا ببطنها ..


قلت طيب وغطاة وشلون (مصرة ) .. قالت مدور .. بعد


انا بدا يدب الياس في اوصالي واتعوذ من الشيطان واخلي


سبيلها ... بس توها بتمشي شكلها اشتغلت الموميري عندها


وقالت ..صح صح ... الغطا فية خاتم ..


(ابد ماعقدتها ) قلت طيب انزلعي بس انتي ووصفك ..



وتسلطت علي كل شوي تمر جنبي والريحة ثابتة ياناس كنها


توها باختها ..


وفي اقرب روحه لي للسوق ..دخلت محل عطور ..واجلس ادور


بين العطور اللي على الطاولة كود القى شي قريب من الوصف


اللي مدري وش يبي ..


وماتجرأت اسأل خفت اتفشل .. بس يوم ذكرت الريحة وذكرت


ان روحة السوق مو بهالسهولة .. تشجعت وقلت لة ..


وهات يانشبة .. وش اسمة وكيف قايل .. قلت اذا عندك عطر


بنفسجي وغطاة مدور وتحت الغطاء حلقة ذهبية هاتة ..


وفعلا ..لقى واحد ..نفس المواصفات ..


وشريتة بدون ماشمة من الفرحة ..بس يوم وصلت البيت الاة مهوب هو


مع ان ريحتة حليلة .. بس كملتة على مضض .. ماش


حتى مااتذكر اسمة كان دورت لكم صورتة ..بس مازالت ريحة عطرها


في بالي ...


وبعد سنة يمكن اكتشفت انها تقصد بويزون ..
واشتريتو تبعا

وكان من احلى واروع العطور اللي جربتها في مراهقتي المؤوودة ~






هنا في الصورة ,,


عطر باريس .. اول عطر شريتة .. وعطر انايس اللي عوضوني بة .. بدال الكارثة الي شريتة ..

( بس ماحبيتوش ) وحبيبي بويزن القديم .. العطر البيدجاني ..


تهئ .. غيروة ونزلوة بشكل جديد .بس فرق الريحة عن قبل .. كان

علية ثبات تشمين الشخص اللي
حاطة من بعد 5 متر ..

ويقال والعهدة على الراوي انهم منعوة عشان اسمة .. (كان هالكلام صحيح الله يخلف )







ويوم بديت أجهز لزواجي .. كنت انتظر على نار دور العطورات .. بغيت اشتريها اول شي من الطفاقة

ولما حان الوقت .. اتذكر رحنا الصباح ..وكنت طول الطريق اتذكر الأسماء اللي جمعتها واللي شميتها ..

وفعلاً .. شريت العطور اللي شفتها بالمجلات ..غير اللي شفتها عندة ..

بس عقب ..فية كم عطر ماطلع حلو .. وفية كم عطر كان عاجبني بس ماعجب بعض الناس ..

ومن العطور اللي من جد مدري وش كنت احس بة يوم اشتريها .. عطر سلفادور دالي اللي على شكل

شفايف .. هههههههههههههههه ... وعطر مونتانا اللي بالصورة :

كانو من العطور اللي عجبني شكلها .. وشريتها كديكور اكثر من ريحة ..

واللي جنبة عطر كنزو .. كان اول عطر توحمت فية اول حمل لي ... وللحين يوم دورت صورتة لكم

تذكرتة وتذكرت شعوري لين شميتة ..












فية عطور نزلت بعد زواجي بفترة .. بس وقتها كنت بديت اوعى لأنواع الروايح اللي تعجبني وتلائمني

وبديت ادقق على مكونات العطور وانواعها .. واحاول اكتشف من المكونات اذا هالعطر بحبة او لا

قبل لا اشمة أصلاً ..

وكان السبب في نضوج تجربتي واحساسي بالعطر بعد الله .. يرجع لهالمجموعه التعيسة اللي نزلت

ايامها ~

مع أحترامي الشديد لكل وحدة عجبها عطر من هالعطور في يوم ما .. لكن انا اتكلم على احساسي انا

وذوقي الشخصي الخاص بمس ...










في الصورة أعلاة ~ عطر باندورا ... اقصى اليمين .. ابو غطا اسود .. من اقوى العطور اللي شميتها .. لكن قوة خانقة

كنت شوي ويغمى علي لين شميتة .. وجنبة ايدين من كاشاريل .. هالنوع الغير شفاف ماعجبني ابد .. ويمكن اكون

وقتها يوم اشمة بمزاج سئ مدري .. لكن ماحبيتة ..رغم انة لايقارن ببشاعه اللي جنبة .. بس نزل بعدة نفس

الشكل لكن شفاف .. كان رائع جدا .. وحبيتة من صماصيم قلبي ... زهري منعش فريش كل شي ...

واللي جنبة سئ الذكر الطويل اللي كنة وحدة مغرورة ... (تعابير حاقدة ) اورغانزا .. اكرهه ..من كل جوارح مخي ..

واللي جنبة بيتوفل .. يمكن يكون اشهر عطر بالعالم مع شانيل نمبر 5 ...

هالعطر كل يوم يزيد سعرة عن قبل ... ووقتها كان كثير يستعملونة .. يمكن عشان كذا كرهتة .. لأني مااحب

الريحة المكررة .. ومازال مطلوب بقوة ..لأنة ثابت من قلب ..

تحت من اليمين سامسارا ... من غيرلان ... من اتعس عطور غيرلان .. (بالنسبة لي ) ادري ارتوس بتزنطني

بس ماحبووووووش ... فية مكون يسبب لي الصداع .. وجنبة عطر بلازير .. يسمونة عطر ليلى علوي

ههههههههههههههههههه عشان شكل الغطاء كان يشبة قصة شعر ليلى علوي وقتها ...

(قلت لكم اهلنا يسمون العطور اسماء مدري وش تبي )
اكرههههههههههه ... ماأطيقة ..

واللي عاد جنبة ... شي استحي اقول عطر .. لأنة لايمت للتعطير بصلة ... فهو للأسف من شلة البف باف

مع احترامي ... هو المدعو رومبا ..











.








  رد مع اقتباس
قديم 09-07-2010   #2

مس~قدها وقدوود
« نائبة الإدارة »
« مُشرفة هُموم وطن + أحدَاث عَلى السطح »
 

رحمتك يارب ..
 
الصورة الرمزية مس~قدها وقدوود

مس~قدها وقدوود غير متواجد حالياً

 رقم العضوية : 4
 تاريخ التسجيل : 06 2008
 الجنس : sex
 المكان : الرياض
 المشاركات : 6,577
 تقييمك لشمواهـ : 1
  الشعبيه : مس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـمس~قدها وقدوود عملاقة شمواهـ
 النقاط : 225376
 مجموع الاوسمة 23

أُوْسْكَار أقوى حَضور 

افتراضي .........









لكن في المقابل ... فية عطور نزلت تقريبا بنفس الفترة .. لكن فرق عن اللي فوق .. مثل الشهير كالك فلاور


في الصورة تحت ..اعلى اليمين .. هالعطر راج في فترة بين نسبة كبيرة من الناس .. وكان من ضمن العطور

اللي بدت تركز على نوع من الزهور اللي ماكانو مركزين عليها كثر ماكانو مركزين عاالتوابل والأخشاب الشرقية ..

اللي جنبة ذا من دولتشي اند قابانا واسمة لايت بلو ..وهو عطر جديد بالمناسبة .. يمكن من سنتين تقريبا شريتة وكان توة نازل

لكن حطيتة معهم لأن بعد ريحتة كانت من الروائح الغير معتادة في العطور .. ويجمعه مع الحليوة الشهير

اللي تحت على اليمين نيود تقريبا نفس الريحة ..باختلافات بسيطة ...

نيود ذا كان وقتها رائع جدا .. ريحتة مميزة .. قريبة من ريحة اللبان العربي .. وميزتة الثبات الغير طبيعي ..

وفي نفس الفترة .. (من 17 سنة تقريباً ) نزل معاه عطر كريستيان ديور ديوون ... كنت وقتها طايحة بغرامة

لأنة بعد ثابت جدا وفواح ..وهالخاصية ترفع اسهم العطر عندي بقوة .. طبعاً مع الريحة الحلوة أكيد ..

واللي جنبهم عاليسار .. هذا قلوريا ... بعد هبوا فية فترة .. كان زهري ..مع اني ماطحت بدابديبة

استعملتة فترة وصرفتة ...


















بطبعي .. لايمكن أكرر العطر إلا في حالات نادرة وقليلة .. على كثر العطور اللي استعملتها بحياتي ..

يمكن ماكررت غبر 8 او 10 .. عطور

وبطبعي بعد ..العطر اللي ينتشر عقب ماأشترية ..وكل مارحت مكان أشمة في أحد خلاص ماعاد

احب اركز علية ...


من العطور اللي انتشرت مثل النار في الهشيم عطر سكيب .. من جد كان نقلة نوعية في العطور ..

يمكن يكون اول عطر فروتي ينزل غير أنة أمريكي وأحنا تعودنا على الفرنسي بالسوق ..

على كثر ماحبيتة أول مانزل ..على كثر ماكرهتة من كثر ماشميتة بالناس ..

وعطر اليزابيث آردن على اليمين .. كان رائع ..وحبيتة كثير .. بس نفس الشي ...

انتشر في محيطي .. وصارو كل مااجتمعنا تكون ريحة الغرفة موحدة .. (وحدوووووووووووة )

واللي تحتة ستيلا .. بعد اشتهر هالعطر اول مانزل ... وعطر لاليلك اقصى اليسار ..

كنت معجبة بة .. وهو من العطور القديمة .. تقريبا من اكثر من15 سنة يوم اشترية ... بس

نفس حالة وحدوووووووووووة ..

اما اللي تحت هذا بشهرة بيتوفل ... هذا كوليكشن الشهير ... ومازال ..ناس كثير تطلبة وتستخدمة ..

وكان لفترة لصيق بطبقه خاصة لأنة من نزل وسعرة يعد مرتفع وقتها . اما عطر جيفينشي اللي في اسفل اليسار ..

شريتة اول مانزل ورغم أن فية مكون موب على ذوقي ... لكن مع المزيج الباقي من المكونات اختفى ازعاجة

وميزتة الثبات ... لكن ماكملتة لنفس السبب ههههههههههههههه وحدوووووووووووة


















طبعاً .. كثير عطور اشتريتها و اخطأت أختيارها .. وخذيت دروس وعبر من وراها ~

منها سئ الذكر أنجل .. اللي على شكل النجمة الزرقاء .. وأكيد كثير منكم يعرفونة .. هالعطر سويتي

بدرجة لاتوصف .. واللي مايحب الروايح السويت لايقرب لة ...

واللي جنبة عاليسار .. بعد انتشر وقت نزولة وكانت لة دعايات قوية .. زادت من انتشارة .. وهو دولتشي فيتا

من ديور ... ماحبيتة .. وتوهقت بة بقوة ...

واللي تحت هذا بربري .. بعد اشتهر .. ولو معجبين كثير ..منيب منهم ..هههههع

رغم اني اهوى ريح الياسمين بالعطور ..لكن بدرجة معينة بسيطة .. مثل حبيبي ذابلجرز من استي لودر

لكن بربري ذا تحسين نفسك ياسمينة تمشي على الارض ..(الله يذكرك بالخير ياسندباد )

واللي جنبة عاد ..من جد واعترف بكل شجاعه اني شريتة عشان شكلة ...

ولا الريحة فشل ذريع ... وأصلا عطور نينا ريتشي منيب صحبة معها ...















ايضاً من ضمن التوهيقات اللتي لاتعد ولا تحصى ..

هالعطرين .. اللي عاليمين الظاهر اسمة سكارف ... من جد مدري وش ابي يوم اشترية ... يكفي شكلة يجيب

المغص ... بس يهون عند الأزرقاني اللي جنبة ... محطم القلوب والجيوب لولو ... من كاشاريل

(ياكثر خنبقتهم هالكاشاريل ...) عطر من 10 يطلع زين ..

ريحتة كنها مربى كرز محطوط بالشمس شهر ... عععععععععععععععععععععععععععععع















ويستمر مسلسل التوهيق .. وهالمرة ملك التوهيق .. ديور اديكت ... مع كل احترامي لعشاقة ..


هالعطر سبب أزمة نفسية لشخصيتي .. أحس وأنا أبخة شي داخلي يقول لا لا ..

مع انة نزل بعدة اخوة .. لكن الظاهر اخوة من الرضاعه ..لأنة الريحة فرق شاسع ..احلى منة 100 مرة

لكن رغم ذلك ماشريتة ..لأن شبح أخوة كان مهيمن على ذاكرتي ..

واللي جنبة ..بيبي دول .. بعد فية درجة من السويت .. ماناسب لذائقتي بتاتا البتة ...














فية عطور .. ماأنتشرت كثير .. وتميزت بها ..وكثير كانو يسألوني عنها ...

منها عطر شيروتي 1881 ... عطر انثوي ورائع ... ثابت وفواح بنعومة .. ويترك اثر في المكان بدون ازعاج

واللي تحتة .. ذا رغم انة من بولغاري .. ورغم انة طلع وكان من العطور الفخمة والثمينة وقتها

لكن في المحيط اللي اختلط معاهم ماانتشر كثير ... وتميزت بة لفترة طويلة .. وكان من العطور القليلة

اللي كررتها ..وللحين احن لة .. خصوصا أنة نجح معي في اختبار الدمج .. وهذا راح اتكلم عنة

في الجزء الثاني من الموضوع ..

واللي عاليسار ذا عطر اعشقققققققققققققة ... مميز ..وثابت ..وفواح .. ومكوناتة غير مكررة

وهو الترا فوليت من راكو رابان ... كثير انسألت عنة ... لكن للأسف ماكررتة ... والحنين لة مشتعل ..

واتوقع راح اكررة قريب ههههههههههههه .. نزل بعد نفس العبوة والشكل لكن ماء العطر لونة فوشي

بس ماحبيتة مثل ذا ..













بعد , هالمجموعه اللطيفة الرقيقة صاحبتني لفترة ... وتميزت بها لفترة .. كانت حالمة وانيقة ..وغير منتشرة

الجميل اللي عاليسار روميير ... كان انيق لدرجة .. وريحتة ثابتة بس بهدوء ..والأنيق ال2 ..سنسي من ارماني

(من الشركات المفضلة عندي بالعطور ) ذائقتهم تعجبني .. تغلب عليها روائح التظافة ..

وجنبة رومانس من رالف لورين اسم على مسمى .. وهالشركة معروفة بالعطور المنعشة السبورت ..

فريش ومنعش وصباحي ... وثابت في نفس الوقت ..من نوع العطور اللي ممكن تعجب الكل ..لأن مكوناته مافية

مغامرة ... اغلبها زهور ..

وتحتى حبيب آلبي هابي كلينك .. نظافة وهدوء وثقة .. وكل شي ..

همن بلجرز الرائع الواثق ... من استي لودر ..وهالشركة مهما اتكلم عن عطورها الأنيقة ماأوفيها حقها

تتميز كل عطورها بالثبات ..يعني خليك واثقة تمام الثقة انك بتفوحين من الصبح لليل من العطر

ومب شرطك كل شوي تبخين منة .. لأن اللي جنبك كل ماقرب بيشمة ..

لكن رغم هالشي عطورها غير مزعجة للغير ...وجنبة طفلي المدلل ارماني .. احساس النظافة

وبودرة الأطفال .. والأنتعاش وكل شي .. يشاركة الدلال عطر نعومي كامبل أوزل عطر طلعتة

بس مالقيت لو صورة .. والحين للأسف مقطوع ..ومنى عيني احصلة .. ريحة بيبي ونظافة الى أقصى

درجة ....














قلت لكم أني ماأحب العطر اللي ينتشر بسرعه وتشمينة بكل مكان تروحينة ..


مدري كيف بتفسرون هالشي .. لكن أنا كذا .. لأن نظرتي للعطر موب نظرة شخص لجماد ..

العطر بالنسبة لي هوية .. بطاقة تعريف تسبقك للناس اللي تقابلينهم .. تخيلوا بأة لما تدخلون

لمجلس مليان حريم كلهم اسمهم خديجة ...

العطر بالنسبة لي لازم يكون لك انتي بس .. تدخلين المكان والكل يلتفت يلحق ريحتك ..

ويميزك عن بقية الحظور .. لذلك وعشان احقق شرط التميز بالعطر .. تعلمت سر الدمج ..

كيف تدمجين عطرين او3 مع بعض ..وتطلعين بخلطة محد يقدر يجاريها ..

وكبف تقدرين تخلطين عطرين قابلين للخلط .. بدون اخطاء ..لأن الخطأ هنا غير قابل للإصلاح

وهالشي فن مهوب سهل ..ومحتاج ذائقة ورواق وحب واصرار على النجاح ..



من العطور اللي ماشريتها بسبب انتشارها الفضيع ..

عطر نارسيزيو الأسود .. رغم أني ماحبيت ريحتة .. لكن ولا فكرت اشترية بسبب اني كل مااروح مكان اشمة ..

ونزل بعد الوردي .. بعد كان فية مكون ماعجبني .. بس خذت اللوشن حقة ..لأني جربتة مع عطر ثاني

وطلع حلو .. وأنا أحب اللوشنات اللي تجي مع العطر لأنها تساعد بثباته ..

واللي جنبة ..فلاوار بمب ... حيتة اول ماشميتة ..بس ماشريتة على طول لأني كنت شارية مجموعه

بس يوم فكرت اشترية كان انتشر بقوة ...

ونفس الشي شانيل تشانس ... و ألورا شانيل شريتة .. واستخدمتة فترة قصيرة .. بس عطيتة اختي

لنفس السبب .. ودولتشي ان قابانا ... اشتريتة هدية لوحدة .. وخلاص طاح من الليست ..














ومثل نارسيزيو والشهرة اللي حققها كان إليين ... هالعطر سرة عجيب من جد ..

نجح نجاح ساحق .. ماأنكر اني بالبداية اعجبت بثباتة ... لكن ماعشقتة .. ولاحسيتة انا

لكن جت فترة من جد .. تروحين عرس كامل ماتشمين الاهو ..هههههههههههههههههههههه

واللي جنبة ذا من فرساتشي .. رغم أني مو من هواة عطور هالدار .. لكن هالعطر شدني

وثباتة كان عنيف ... شميتة بوحدة من مسافة .. وسألتها عنة ...

لكن ماأشتريتة ... والأخ المتوزي تحت .. عطر جي ... رغم انة يعتبر رخيص الثمن ... (يمكن من شان

هيك انتشر وكرهتة
)













من عطوري الجميلة اللي كررتها ...

عطر تووم فورد ... بلاك اوركيد .. هالعطر حكاية ... غموض .. وجاذبية .. وثبات لايوصف ..

تدخلين المكان ويسبقك ويغلف المكان كلة ... وانتي توك داخلة .. من جد من اثبت العطور اللي مرت علي

بالبداية ومع اول شمة قليل اللي عجبهم .. من شدة تركيزة .. لكن بخية واتتركية كم ساعه وارجعي

شمية كيف .. راح تتغير نظرتك ..

واللي جنبة ذا بيت ... حبيبي الرائع الراقي .... اعشقة بكل معني الكلمة ..صاحبني فترة طويلة ..

وكانت لي ذكريات معاه .. لأني أخذتة معاي لسفر .. ومن اشمة ترجع ذكريات السفرة بكل تفاصيلها

لأني من النوع اللي أربط الذكريات بالرائحه ..

وتحتة الرقيق نوا ياهووو مرهف .. ياهوو ساحر .. اموت بدباديبة .. وجنبة الطويل الشامخ .. انفي مي من قوتشي

ريحة نظااااااااااااااااافة من قلب ... تحسين انك كتلة نظافة وانتي تمشين ..














وبعد هالعطر الجميل من جان بول جوليتيية ... العطر الصدمة ..هههههههههه لان هالعطر منع عندنا

بسبب شكلة .. بس جبتة اول مانزل تهريب من دبي .. ههههههههههههه تقريبا من اكثر من 16 سنة











ومن العطور اللي لها ذكرى لاتنسى بحياتي ومازال يأسرني الحنين لها ..(لاتقولون اشتريها لأطب من السطح )

لأنها انقطعت من الشركة ..وماعادت موجودة .. دورتها ووصيت عليها ولكن مافية فايدة ..

آوي من لانكوم هذا يذكرني بريحة بنتي وهي مولودة ..لأنة كان عطر النفاس ... فريش وهادي ...

واللي جنبة قاردن من غيرلان ... ودي ابكي لين شفت صورتة .. مشتاقة لة لدرجة ..ماتتخيلونها ..

انيق وفواح ورائع بكل معنى الكلمة .. والعجيب اني مالقيت عطر يشبة ريحتة من سنوات ...

















بإختصار .. هذا جزء من قصتي مع العطور .. (كل هالقرقر وأختصار يامس ؟)

العطر عالمي الحالم .. لنا لغة نتفاهم فيها مع بعض .. رائحه العطر مهما كانت تستحوذ على

حزء كبير من اهتمامي ..~

العطر ..هو أول حكم افتتح بة قراءتي لأي شخص يقف امامي .. اختيارة للعطر وكميتة اللي مستعملها

تكشف لي جزء من شخصيتة ..

ماأقدر أشرح لكم لأن هالشي ماينشرح ..

شئ نما معي خلال سنوات عمري .. وحبيتة بكل صدق ... وسيطر على ذكرياتي ..







وقريباً قدن قدن قدن .. الجزء ال2 من الموضوع .. اللي راح اكشف لكم عطوري الحالية .. واسرار ادراجي ..

مع سوربرايز صوغنن راح يعجبكم ~







برايفت ْ


الموضوع كان طويل جدا ... وحاولت على قد ماأقدر اختزل تجربتي بدون ماأهضم حقها ..

لأن العطور عالم لايمكن حصرة بموضوع واحد .. وللمعلومية جميع الصور في الموضوع ليست من

تصويري .. لكن بالجزء الثاني القريب جدا ..كل الصور بعدستي ...








الجزء ال2 :

كما وعدتكم ~ رحلة إلى عالمي الحالم + هدية بالداخل ~










.







  رد مع اقتباس
قديم 09-07-2010   #3

Artos ~
« رئيسة مجلس الإدارة »
«مشرفةالشعر + Shamoa T.v »

عَجز أن يَكُون أنت , فَشتمك !!
 
الصورة الرمزية Artos ~

Artos ~ غير متواجد حالياً

 رقم العضوية : 2
 تاريخ التسجيل : 06 2008
 الجنس : sex
 المكان : الرياض
 المشاركات : 5,074
 تقييمك لشمواهـ : 1
  الشعبيه : Artos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـArtos ~ عملاقة شمواهـ
 النقاط : 593322
Icon19 رد: قصتــي مع العطـــور ~ قد لاتٌشبهها قصــة

وَ أنا أشهد إنك ملكة العطور

عن تجربه وَ سبق إصرار وَ ترصد ,, You are the best


ريحتك من يوم ماتدخل البيت ماتطلع إلا بعد عمر طويل ,, يعني ريحه تظل يومين

وَ بنفس الوقت ماتكتم على أنفاسك ,, هذي الريحه المميزهـ عندي ,,


مهب ريحه الله ياكافي لو لمستي عباتها صارت أدينك عطرها , لو عطيتيها عصير

تحولتي إنتِ لـ قارورة عطر ,, حلو عطرك مايخترق خصوصية الآخرين ,, وَ بنفس الوقت يفرض و جودهـ

[ مسموس عطرها يفرض وجودهـ ]


بقولك نقطه صغنونه !! ..

العطور إللي تنبخ هي عطور تركيزها أخف , ولكن شديدة التركيز و إللي غالباً ماتوصلنا بسبة كثرة الماده الكحوليه هي إللي تنكب مثل إللي توصلنا أول ,,

بتلاحظين الأوربيين إذا راحوا يشترون عطر غالباً يكون مركز ويجيك من النوعية إللي تنكب ,, حتى شوفي بـ الأفلام الأمريكيه إذا جاو يصورون لك مشهد sexy ,,


يجيبون لك وحده تمسح بـ العطر على رقبتها , بالرغم إن الأوروبيين غالباً مايحبون العطر بـ طريقتنا وَ تركيزنا , حتى لو شافوك يقولون لك ,, وش عندك متعطرهـ بهالشكل ؟! ..


مسمس ,, الله يطول بعمر أبوك وَ يزيدك عشقاً بعالم العطور


بتستغربين لو أقولك عطر بويزون و لا مرهـ شميته وَ لا حتى حاولت أشمه

دائماً ماأرضى أحد يبخني بالسوق , لأني من النوع إللي العطر يسد شهيتي لـ أبعد درجه


غير إن كل مادخلت منتدى وَ لا موقع ألقى البنات متعطرين منه , فخلاص أحسه مهوب لي

[ حشى يعني يخترعون عطر لـ أجلك ؟ ] ..


عطر موناتانا أمي كانت تتعطر فيه , بس أنا كنت أكرهـ شكله ماأحبه ..

بس ريحته ماتعنيني ,, لأني أفكر بالعطور إللي تتشقلب ..


بالنسبه لـ عطر سمسارا ,, ههههههههه تراني ماأحبه أبداً ,,

هو الوحيد إللي مايليق بـ جيرلان ,, ريحته تغثك وَ تحسينه وحده متعطره وَ تعرضت لحرارهـ



أما رووومبا , حنا نسميه الرعب في زجاجه ,, صدقتي شين وَ بقوهـ ..

أنا أختلف جداً بـ ذوقك بالعطور , ولكن أتوافق معك بكل عطر كرهتيه ,,

يمكن لأني احب ريحة المسك وَ الأخشاب بـ عطوري ,, و إذا فيه زهور أحب المسك يكون طاغي

ولا ضير من الفواكه لكن بـ حدود


وأنتِ تحبين الياسمين مثل مالاحظت !! ولكن نوعيات معينه من الياسمين ,,

وبنفس الوقت تحبين ريحة الورود ,, صووووح


بنتظر الجزء الثاني بـ فارغ الصبر ,, فيه عطر لو ماذكرتيه بتكونين فوتي نص عمرك !!

حالياً منقطع من السوق , بس وقتها مايستخدمها إلا البعض ,, يمكن سعرهـ بـ 600 !!

قبل شيء 10 سنوات ,, مستحيل محداً ينتبه له ,, مهوب بس من ترويعته من حسنه



موضوعك لا يعلى عليه ,, خاصه إني بحاجه لـ غربله من أول وَ جديد لـ أغراضي

ولكن الجزء الثاني هو إللي راح يخلينا نغربل أدراجنا من صدق ,, هالمقدمه بس مقبلات لـ الزلال الحقيقي حسب توقعي ,,

ركزي على جزئية اللوشن وَ تغنيج الجسم ,, هذي أهم من البخ عندي ..

عشان مايوصلك العطر إلا وَ جسمك بارد ..


سبحان الله أنا ماكان عندي ربع شغفك بالعطور ,, حتى أيام الثانوي أروح المدرسه بدون عطور ولا مايحزنون !! أشوف صديقاتي بكل حصه يـ بخون بخ ,, بشكل جنوني

وأنا كأني بنت البطه السوداء ,, من النوع إللي ماتخليني العطور لا أذاكر وَ لا آكل [ هذي مشكله ] ..


يعني مزاجيتي مصيبه ,, ولكن كنت دايم أقول لأمي لا لا إذا بتروحين تعطري من ذا أو من ذاك ,, مدري شلون تعطينا وجه ,,

وأحب ريحة التفاعل الكيميائي بين العطور وَ ريحة أمي ,, أمي وَ أختي لهم ريحه حلوهـ .. أنا أحسها حلوهـ يمكن لأني أحبهم ,,


فما أحب العطر علي وَ أحبه عليهم ,, عارفين البوسه إللي تجمع بين الشم وَ القبله [ أبوك يالوصف ]

هذي ماتلوق إلا لـ أمي


موضوعك أستحق مبدع مبتكر لأن حلو نسمع رأي عشاق العطور بـ مصداقيه وَ شفافيه

خاصه إن أغلب الحريمز يحبون يحتفظون ببعض السكرت لـ أنفسهم ,, تميزتي عليهم ..


وأبدعتي وَ عيشتينا هالحب وَ الشغف ,,


بس هاااهـ لا يصير جزءك الثاني بعد مانموت .. ترى الصبر ماأعترف به !!

دمتِ بـ حب ..


















artos-chic-blog
  رد مع اقتباس
قديم 09-07-2010   #4

chica en el amor
« Ms.unique »
 

أنا عيناك هُمـا سكنــي ,,
 
الصورة الرمزية chica en el amor

chica en el amor غير متواجد حالياً

 رقم العضوية : 3497
 تاريخ التسجيل : 01 2009
 الجنس : sex
 المشاركات : 4,858
 تقييمك لشمواهـ : 1
  الشعبيه : chica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـchica en el amor عملاقة شمواهـ
 النقاط : 139840
 مجموع الاوسمة 15

وَسام الجهود المُميزة لعام 2011 

افتراضي رد: قصتــي مع العطـــور ~ قد لاتٌشبهها قصــة

الله يا مسمس , الله عليك

لا تكلمتي وسولفتي وخذتي راحتك أحس انك قريــبــة من ألبي بشكل مو طبيعي ,,,
المقدمة روعة ,,,
انتي ماشالله عندك موهبة أو عشق للعطور ويمكن من طفولتك كنتي حاسة بموهبتك ,,

وأبوك الله يطول بعمره يااا رب , ويشوف أحفاد أحفاده ,,,


تدرين قعدت أفكر , لو بيوم ربي كتب لي وشفتك وجها لـ وجه , أي عطر رح أحط ,,,
< توهقت

كاشاريل أنيس أنيس , عطر طفولتي ,
لحد ما صار عمري 10 سنين يمكن ؟؟؟

بعدها ايستيه لودر ,,, بلشيرز ,,,

بعدها NOA أول عطر أنا اخترته وله مكانه خاصة مخصصة بـ قلبي ,,,

اشتريت منه يمكن 6 أو 7 مرات ,,,


فلور بومب بعد طحت فيه ,,,

كارولينا هيريرا sexy 212 ,,,


حسيت ذوقي مختلف كليا عن ذوقك ,,,
أنا أحب الروايح الـ sweet حيل حيل ,, أو الفانيلا أو المسك ,,,

عطري التوب :
اسكادا ماغنتزم ,,,
sweet لأبعد حد ,,,

بنفس الوقت أحب عطور Stella وإستغربت انك ما تكلمتي عنهم ؟
< حسيت رح يعجبونك ,,,

أحب بويزن الأحمر Hypnotic أظن إسمه ,
الأسود مرره ما أحبه , مره شريته عشان سمعته بس كرهت نفسي يوم رجعت البيت وبكل ثقة بخيت منه !
على طول شاور P:

معروف عند الكل : عطور = مسمس ,,,



بانتظار الجزء الثاني وتصويرك وأغراضك ,,,












  رد مع اقتباس
قديم 09-07-2010   #5

CHOCOLATE
« كبيرة مُشرفات شَمواه " »
« مُشرفة أصْـدِقَـاءُ الضْـوْء »
 

live life to the fullest
 
الصورة الرمزية CHOCOLATE

CHOCOLATE غير متواجد حالياً

 رقم العضوية : 30
 تاريخ التسجيل : 06 2008
 الجنس : sex
 المشاركات : 5,145
 تقييمك لشمواهـ : 1
  الشعبيه : CHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـCHOCOLATE عملاقة شمواهـ
 النقاط : 137929
 مجموع الاوسمة 16

أُوْسْكَار أفَضل مُواكبة لَحدث 

افتراضي رد: قصتــي مع العطـــور ~ قد لاتٌشبهها قصــة

واااااااااااااااااااااااااااااااو

اش الموضوع دا يامسمس

رجعتيني لذكريات كثيره ..

بويزن القديم باندورا .. بلازير .. فلوريا ..لولو

كانت من عطوري وأنا في المتوسط حلو ولا مو حلو موضه ونمشي عليها ..~

بلازير أتذكر جاني هدية وما حبيته أبدا ..

جان بول جوليتيية ..

مين كان عنده شي ممنوع واو الي يقدر يجيبه بس ما جيبته ولا حبيته


اورغانزا ..

أكره ريحته تسبب لي غثيان هوا وسينما ما اتحملهم ابدأ



الترا فوليت من راكو رابان

أحبه من كل قلبي يفكرني بشهر العسل مازل عندي فيه شويه للذكرى ..





إليين

حلو وعجبني بس كرهته من كثر ما أنتشر فتره صار الحريم كلهم نفس الريحة


عطر تووم فورد ... بلاك اوركيد


عطري من فتره حبيته بعده ما عجبني شي ..


في انتظار الجزء الثاني ..














  رد مع اقتباس
قديم 09-07-2010   #6

C H E E R Y
« Ms.unique »
 

آنهُ عمرٌ .. وَ سيَنتّهِيْ !!
 
الصورة الرمزية C H E E R Y

C H E E R Y غير متواجد حالياً

 رقم العضوية : 6100
 تاريخ التسجيل : 03 2009
 الجنس : sex
 المكان : جَّ ـازَانْ}~ فِدِيتْ ترآبهَـآآ
 المشاركات : 6,941
 تقييمك لشمواهـ : 1
  الشعبيه : C H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـC H E E R Y عملاقة شمواهـ
 النقاط : 250517
 مجموع الاوسمة 14

أُوْسْكَار المَناهِج التَعليمية 

إرسال رسالة عبر MSN إلى C H E E R Y
افتراضي رد: قصتــي مع العطـــور ~ قد لاتٌشبهها قصــة



مسمس
آكثر ما انعرض هنا ذكريااتي

العطور ما اقولك اني اعشقها مثل حكايتك ..
بس آهتم لها .. وآهتم للمكون حقتها ..
آميل لروائح التوابل آكثر من السويت والفواكه ..
وآحب العطر لمن يكون ريحته نظافة

عطر ابوطير هههه .. ياما شفته مع امي وجدتي ..
تبغين الحقيقة .. كثير عطور اليوم اكتشفت شركاتها لوووول
بالذات القديمة .. اللي كنت اعرفها شكلاً لا اسماً

عطر انايس انايس .. وعطر باريس من سان لوران .. هاذي اختي ..
من يوم تزوجت وآنا بثاني ابتدائي .. وهاذي كان عطور عرسها ..
الى الان .. عندها العطرين .. بس مشتريتهم قريب .. على قولتها للذكرى ..

المشكلة اننا كلنا نشم ونتذكر ههههههههههه

عطر باندورا حلو والله .. كان يعجبني .. بس اليوم عادي جدن ..
بلازير .. الله على ايام بلازير .. رافقها معايا عطر جي كازنوفا الرجالي ..
سمسارا على قولة اختي كأنه زيت دابر املا ..
عن نفسي هبيت فيه فترة .. بس ماكررت العطر مليت منه

بربري آحبه .. صحيح على قولتك كانك ياسمينة لووول .. بس حلو والله
<< زعلانة على عطرها

قوتشي انفي مي .. هذا حبيب القلب .. اعشقه بجنووون ..
هالمرة بما انك تعجبك روائح النظافة .. جربي عطر بور موي من درعة
قسسم بالله ريحته قممة الانتعاش والنظافة << تسوي دعاية


بانتظارك .. مع الجزء الثاني وطريقة الدمج ..
شوقتيني والله ..

















حسابي التويتري التعليمي .. دعمكم ياحلوات
Cheer_Education
عذراً شمواه ..
  رد مع اقتباس
قديم 09-07-2010   #7

صدى
«مُشرفة حَدِيثُ الصّوره | ~ »
«مُشرفة دينُنا أسلوب حياتنا »
 

الحرمان ان تقرأكل شئ الاالقران
 
الصورة الرمزية صدى

صدى غير متواجد حالياً

 رقم العضوية : 8425
 تاريخ التسجيل : 05 2009
 الجنس : sex
 المشاركات : 7,889
 تقييمك لشمواهـ : 1
  الشعبيه : صدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـصدى عملاقة شمواهـ
 النقاط : 114592
 مجموع الاوسمة 8

وَسام الجهود المُميزة لعام 2011 

افتراضي رد: قصتــي مع العطـــور ~ قد لاتٌشبهها قصــة

وش السااالفه ..

ماشاءالله تبارك الرحمن ..

عين الحسود فيها عووود ..

اللهم زد وباارك ع الموااضيع الحلوووه ..

لي رجعه .. صارت الشاشه عندي وشششششششش .. اريح وارجع ..


وه بس وه يامسمس ..

ياازين ريحة العطوور .. اعشقها بجنووون ..


نجي للمهم ..

يازين ريحة عطر ابو طير رووعه يذكرني بأمي الله يحفظها وبغرفتها ..

عطر باريس احب ريحته يذكرني بطفولتي وايام حلووه وهو ريحته باااارده ..

انايس ماحبيته لانه من الورد وانا مو ذاك الزود مع الورد بالعطور ,,


مونتانا اتذكره مع اختي ماحبيته .. قوي مررره ونوعه يكتم ’’

باندورا حلو موب شين بس الحين نو وي ولا افكر اشتريه ..

بلازير يذكرني بهدية نجاحي ايام الثانوي ..

اورجانزا ماحبيته ,,

رومبا وبيوتيفول اقل من العادي ..

تشانس ومدموزيل على انهم مقاربين لبعض وحلوات ريحتهم الا انتشارهم اوووووووب طبيعي ..

رومانس شريته وانا بعز الوحااااااااام كرهته كره ..

اللي احبها مرررره ..

(( انفي مي 3 مره اشتريه .. ستيلا الاسود .. كالفين سي اتش واااه رووعه .. اللور يووه ادووخ عليه

ونارسيزو اول ماترشينه مو ذاك الزود بس خليه يبرد رووعه .. بس مااعيد شرااءه ,.,

تود فورد ناويه عليه ان شاءالله وفيرساتشي .. نوا من ضمن اللي توحمت منهم ..

العطر المخصر اعطتنياه زوجة اخوي بس عادي يميل للشرقي وشوي قووي مرره ..

اديكت ديو الزهر حبيته باارد مرره ,,

انا يعجبني العطر الفوااح والقوي وبنفس الوقت باارد ..

وماننسى المسك من عبد الصمد القرشي ..

واحسن شئ انك تخلطين عطر فرنسي وعطر شرقي وتبخري بعوود واااااه بتصيري ارووع من الرووعه..

تشكراات مسمس وننتظر الجزء الثاني ’’












خيرة الله لعبده خير من خيرته لنفسه ..
كم من امور حجبها الله عنّا وبقيت في قلوبنا علامات الاسى .!
ولو فتح الله لنا الغيب لسجدنا لشكره ..
ف الحمدلله
  رد مع اقتباس
قديم 09-07-2010   #8

! اوروبية الهوى !
« Ms.unique »
 

والله لك وحشه كبيره ياشموآهـ
 
الصورة الرمزية ! اوروبية الهوى !

! اوروبية الهوى ! غير متواجد حالياً

 رقم العضوية : 14
 تاريخ التسجيل : 06 2008
 الجنس : sex
 المكان : آرض آلحجآز
 المشاركات : 3,135
 تقييمك لشمواهـ : 1
  الشعبيه : ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ! اوروبية الهوى ! سوبر ستار شمواهـ
 النقاط : 49642
 مجموع الاوسمة 9

وَ سام التوآجد العطر لعآم 2011 

افتراضي رد: قصتــي مع العطـــور ~ قد لاتٌشبهها قصــة

*


مسمس

قسم رجعتيني لسنتين وراء بس ههههههه .. ذكريات ذكريات ..

مت مت ضحك على القديم

يالله ياكنت انا و اختي مضاربه عشان العطور

ما يحلى لها غير عطوري .. ولا يحلى لي غير عطورها <== تناحه بعيد عنك

مونتانا


ياذكرياتك يامونتانا .. حبيبي كنت اموت فيه مو عشاني .. عشان ابلتي المفضله شفتها تتعطر منه ومن العصر وانا بالمحل ادوره هههههههه ..

باريس عطر اختي كنت اتضارب معاها ابغاه مو والله لريحته لا عشان اسمه خخخخخخخخخخ


سامسارا & باندورا

يالله .. ناسيه والله كان يعجبوني والا لا .. باندورا الاكيد حق اختي .. اتذكر كان ماغير عينها علي فيه ياويلي لو اقرب منه هههههه ..

<== المصيبه نتفق كل وحده تشتري عطر غير الثانيه عشان نتعطر فيهم <== الله يعافيكم ولا يبلانا هههههههه


ذا ون ..

كرهته .. كرهته .. كرهته .. من الوحم الاخير ..

ماحبيته ولا احب اشوف علبته ..

..

بلازير

امي كانت تقول تراه عطر الجن .. لا تتعطرون منه .. <== عفّنا فيها واحنا ماغير نكبكب على نفسنا .. ههههههههههه
يارب يطول لنا بعمرها

..

جان جوليتيه

قبل امس اشوفه مع سلفتي .. <== ماشاءالله عليها تحب تحيي الذكريات .. مرررررررررررره ريحته مو حلوه ..

..

تعجبني عطور بربري ..


بس ليه ماحطيتي عطر هوت جنفشني .. اللي ممكن نحط صورنا فيه يووووه ريحته جنان .. الوحيد من العطور القويه اللي تعجبني ..



بلاك اوركيد ..


نفسي اشمه


..

يااااااااارب يسعدك يااحلى مسمس .. موضوعك مفعم بالجمال .. والروائح الحلوه .. اهم شي عندي الجزء الثاني ..

كثري من العطور البارده الرايقه الناعمه ..

عطور جوسي عشق لا يضاهيه عشق ..

و ربي يحفظ لك الوالد ويطول بعمره يارب ..













One Of My Best TOPICS "Oprah winfrey" i
Click Here.................................................. .......................

  رد مع اقتباس
قديم 09-07-2010   #9

!خط النار!
« Ms.unique »
 

..
 
الصورة الرمزية !خط النار!

!خط النار! غير متواجد حالياً

 رقم العضوية : 66
 تاريخ التسجيل : 06 2008
 الجنس : sex
 المشاركات : 3,836
  الشعبيه : !خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ!خط النار! سوبر ستار شمواهـ
 النقاط : 44856
 مجموع الاوسمة 11

وَسام الجهود المُميزة لعام 2011 

افتراضي رد: قصتــي مع العطـــور ~ قد لاتٌشبهها قصــة

ليش خلص الموضوع كنت خاااشه جو مع طفولتك وابوك الله يحفظه لكم اسلوبك يهبل


الله يامسمس على عطر بلازير ذكريااااات( مت ظحك على ليلي علوي كخخخ) هذا طحنا فيه بالمتوسط كل

الفصل اشتراه عشان الابله اللي نحبها كانت تتعطر منه ,, مسكينه يوم تدخل كل البنات اللي يحبونها متعطرين منه الين كرهته وطلع مع خشمي


رومير احبه ويناسب ريحه جسمي .. ياحبي لك ذوقك مثلي <<بتلزق فيك غصب
وغريب ماشوف احد يمدحه ,,

حتى فلور بومب فضيع اذا برد ..

الين انا هذا العطر اللي اكثر من مره ادخل المحل واغصب نفسي ابغى اشتريه عشان المدح اللي جاه بس ماقدرت .. استغرب كيف يحبونه

عطر باندورا يقرف ويصدع وكل ابو شي كان عند زوجه اخوي والله كنت اتعب نفسيا اذا حطته



عطر نينا ريتشي(دوسي دولا ) طحنا فيه طيحه يهبل الله يسعدها وحده من البنات كانت تسميه دوسي يادنيا




الحين انا صرت اميل لـ عطورات توم فورد .. دخلت عالمهم مع اني ماحب الثقيل بس فعلا اللي يجرب بلاك اوركيد مستحيل يشوف غيره من العطورات



و متحمسه جدا للجزء الثاني ..















  رد مع اقتباس
قديم 09-07-2010   #10

الثلاثينية
« عضوة شرف ~ »

احبـ shamoaـك
 
الصورة الرمزية الثلاثينية

الثلاثينية غير متواجد حالياً

 رقم العضوية : 33
 تاريخ التسجيل : 06 2008
 الجنس : sex
 المكان : الامــADـــارات
 المشاركات : 3,625
 تقييمك لشمواهـ : 1
  الشعبيه : الثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـالثلاثينية مشهوره بشمواهـ
 النقاط : 18862
 مجموع الاوسمة 8

شُكر وَ تقدير لعام 2010 

Icon14 رد: قصتــي مع العطـــور ~ قد لاتٌشبهها قصــة

رهييييييييييبه يا مس مس

يباله قعده هالموضوع واستدعاء ذكريات جدييييمه

...........

يووووووه يا مس مس الظاهر كلنا كانت لنا نفس الذكريات

بس قصتج مع العطور جدا جميلة ولا تشبهها اي قصة

انا كنت احب العطور و موتي وحياتي لما ادخل بيت حد من معارفنا

ادخل على طول غرفة الام و اشوف شو تحط على تسريحتها ؟؟

و ياااااااااااا ما اطلب اروح الحمام و اسوي عمري داخله حمام الام بالغلط

بس عشان ارضي فضولي بشوفة الغرفة والتسريحة خاااصه

شريت كثير عطور و شي اخذه من امي لما تكمل نصه وتمله والا اختي اللي اكبر مني

بس مااااااااااااااا انسى عطر شانيل No.5 لما يابه لي ابويه - الله يرحمه -هدية من اسبانيا وانا صغيرة

تقريبا كان عمري 12 ... وكان من النوع السائل مش بخاخ

فرحت فيه وااااااااااااايد ... لانه اول مرة يتذكرني بعطر مش لعبة والا شنطة



و اول مرة اعرف انه عطر بو طير من برجواز

ثره كانوا كاشخين هلنا بالزمانات



عطر كالك فلاور كان مكسسسرر الدنيا عندنا ... خاطري اروح اشمه الحين !!

و من هالعطور القديمة عندي الحين سمسارا...شميته بربيعتي وعيبني عليها

يابت لي اياه هدية من باريس ... بس لما تعطرت فيه ما عيبني وايد

والحين بالخزانه بكرتونتنه



و بويزن البنفسجي اسطووورة بزمانه ومازال

ما الومج يوم خذتي البنيه للحوش وحققتي معاها


عشت جو معاااج ولا احلى ومع قصتج مع العطوور

ننتظر الجزء الثاني بشغف















  رد مع اقتباس
إضافة رد

مواقع النشر (المفضلة)

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
[شَعر] قصــة شعر مناسبة *اميرة بكلمتي* إستفسارات جمالية | Beauty Q !! 1 01-06-2012 12:12
قصــة بطل }..Guevara رمــز الثورهـ والحريه ||~ Ro0oRy بصمات 45 30-12-2011 07:42


الساعة الآن 01:50

 


Powered by vBulletin® Version 3.8.7
Copyright ©2000 - 2017, Jelsoft Enterprises Ltd.
Ads Management Version 3.0.1 by Saeed Al-Atwi
جميع المواضيع والآراء تمثّل وجهة نظر كاتبها فقط ولا تمثل منتديات شمواه بأي شكل من الأشكال ما لم يوضّح غير ذلك.
Des By || [email protected]

جَميعُ الحُقوق مَحفُوظة لمُنْتديات شَمْواهـ © 2008 - 2012