السلام عليكم
التارت من أحب الحلويات لقلبي وهذه الوصفة معتمدتها بمطبخي من زمان وهي للأخ توب شيف جزاه الله خير ونزلتلكم وصفة التارت كاملة من لابتوبي القديم.
طريقة عمل التارت بثلاث نكهات
مقدمة
من زماااااااان ودي أنزل ذا الموضوع والله وفيه غيره بعد كثييييير بس المشكلة ودي أجمع أكبر كم من الصور و عشان أصور لازم أطبخ ، ولو طبخت من بياكل اللي أطبخه ؟؟؟ غير كذا أنا أحب أنزل مواضيع تكون مرتبطة شوي مع بعض بحيث أقدر أعطيكم أكبر كمية من المعلومات . وعشان كذا سامحوني عالقصور و التأخير في بعض المواضيع .
اليوم موضوعي عن التارتات tarts موب التورتات أو الطورطات لأ هذول غير . التارت أقرب شي لها هي الباي أو الفطيرة pie . طبعا وجه الشبه بينهم هو إنهم كلهم مكونه من عجينة أو قشرة وفوقها شي بس طبعا فيه فرق وناس كثير، كثير كثير بعد ما يدرون وش الفرق بينهم .
التارت غالبا تجي محشية بحشوة جدا ثقيلة ودسمة ، بينما الباي أو الفطيرة حشوتها أخف بكثير . الباي أو الفطيرة غالبا فوقها سقف أو غطاء بينما التارت لأ . وطبعا القشرة غالبا تختلف وهي تقريبا الفرق الأكبر بينهم .
قشرة الفطيرة تجي عبارة عن شرايح نحيييييفة من العجين أو flaky تقريبا زي البف بيستري ( طبعا غييييييييييير ) بينما قشرة التارت تجي تتفتت . بس هذي كلها ميب شروط بقدر ماهي خطوط عامة يعني جربوا على راحتكم و الإسم في النهاية موب مهم .
فيه نوعين عجين مستخدمه غالبا في التارتات الأول هو العجينة الحلوة ( pate sucree ) و الثاني هو العجينة المتفتتة ( pate brisee ) بس كل النوعين تتفتت بس الثاني أكثر و لو جربتوها بتفهمون وش قصدي .
راح أعطيكم طريقة العجينتين و أعطيكم معاها ثلاث وصفات مشهورة جددددددا .
أول وصفة بحطها هنا وصفة جدا جدا سهلة و جدا جدا جدا لذيذة خصوصا للي يحبون الشكولاته .
راح أستخدم هنا العجينة الحلوة بس يمديك تستخدمون العجينة المتفتتة ولو إني أشوف إن الحلوة هنا أفضل .
مايحتاج أعيد طبعا ! زي ما قلت ألف مليون مرة جودة التارت هنا تعتمد على جودة الشكولاته فياليت تستخدمون أحسن نوعية عندكم ، موب عذر إنكم ما لقيتوا دوروا زييييييييين و بتلاقون بس حرام تستخدمون نوع سيء وتعبون نفسكم عالفاضي إشروا جاهز أحسن إذا كذا .
الشكولاته عبارة عن بذور نبات معين محمصة و مطحونة بعد الطحن يتكون عندك شراب شكولاته ، هذا الشراب يفصلون مكوناته إلى زبدة كاكاو ( شي غالي جدا يستخدم في الكريمات الظاهر ) و شكولاته صلبة .
بعدين يخلطونهم مرة ثانية بنسب مختلفة مع سكر ومواد ثانية وهذا للي يكون الشكولاته .
طبعا الشكولاته تتصنف حسب نسبة الشكولاته الصلبة للمواد الثانية اللي أغلبها سكر . وعشان كذا تلاقين نسب مكتوبة مثل ٧٠ ٪ ٥٠٪ وكذا … طبعا الشكولاته ال ٧٠٪ فيها ٣٠ ٪ مواد ثانية منها سكر بينما ال ٥٠ ٪ فيها ٥٠٪ مواد ثانية وهذا معناه إن الشكولاته ال ٧٠ فيها سكر أقل من ال ٥٠ وكذا …. عشان كذا الشكولاته ال ٧٠ تلاقونها مرة أكثر من ال ٥٠ وبنفس الوقت فيها طعم شكولاته أقوى .
طبعا تلاقين أحيانا يكتبون شكولاته غامقة أو مرة بس هذي ما تعطيك أي معلومة عن كمية الكاكاو اللي في الشكولاته اللي عندك ؟؟ ممكن تكون من ٥٥ ٪ إلي ٨٠ ٪ هذي كلها شكولاته مرة و عشان كذا غالبا الأنواع الجيدة يكتبون عليها كم .
طيييب وشلون تعرفون النوع الجيد ؟؟؟ إقرأوا المكونات بتعرفون أشياء كثييييييير عن الشكولاته اللي عندكم بمجرد قراءة المكونات . الخلاصة هنا كل ما كانت أقل كل ما كانت أحسن ، مصانع الشكولاته يحاولون يوفرون غالبا في تكلفة التصنيع وعشان كذا أحيانا يستخدمون مواد غريبة .
المكونات دايما تجيك مكتوبة من الأكبر للأصغر يعني أول شي بتقرينه هو أكثر شي في الشكولاته اللي عندك وبعدين للأقل وكذا .
غالبا المواد اللي مفروض تلاقينها في الشكولاته حقتك هي : شكولاته أو كاكاو + سكر + مستحلبات ( ليسثين الصويا أو شي زي كذا ) طبعا هذي وظيفتها تذوب زبدة الكاكا في باقي المواد + وفانيلا . وللشكولاته بالحليب زيدي عليها حليب .
يمكن تلاقين زبدة كاكاو وهذا شي ممتاز طبعا ومعناها إن الشكولاه من نوعيه جيدة غالبا .
الخلاصة بالنسبة لإختيار الشكولاته الغامقة ( ٥٥٪ إلي ٨٥ ٪ ) : أول شي غالبا شكولاته صلبة أو كاكاو ( cocoa solids ) ، بعدين سكر ، بعدين يمكن تلاقين زبدة كاكاو ، بعدين فانيلا طبيعية أو صناعية ( طبعا الطبيعية أفضل ) ، بعدين بتلاقين المستحلبات ( emulsifiers ) واللي غالبا إسمها ليسثين ( lecithin ) . لو لقيتوا بودرة كاكاو أو أي مواد غريبة ثانية مثل زيت نباتي أو نكهات صناعية إعرفوا إن الشكولاته من نوعية سيءة على طووووول .
بالنسبة للشكولاته بالحليب ( ٣٠٪ إلي ٤٠ ٪ كاكاو ) : هنا غالبا أول شي بتلاقونه هو السكر ، الحليب ، زبدة الكاكو ( لو وجدت ) ، بعدين الشكولاته الصلبة ، بعدين المستحلبات و الفانيلا .
أخيرا الشكولاته البيضاء ( طبعا هذي مهيب شكولاته أصلا لأن مافيها كاكاو بس زبدة كاكاو ) : أول شي سكر ، زبدة كاكاو ، حليب ، مستحلبات وفانيلا .
الشكولاته السيئة غالبا مافيها أي شكولاته صلبة أو زبدة كاكاو غالبا مصنوعه من بودرة الكاكو العادية ، غير كذا غالبا إذا قريتوا المكونات أول شي بيجيك هو السكر وبتلاقون فيها نكهات صناعية بأسماء غريبة .
كثير ناس ما تدري وش المفروض الشكولاته تكون ؟؟؟ المفروض للشكولاته الغامقة إذا كسرتيها تطلع صوت قوي !! ما تكون لينة أبدا ، طبعا هذا الشي ما ينفع بالشكولاته بالحليب و البيضاء . حطي الشكولاته بفمك على لسانك بدون ما تحركينها وشوفي كم تاخذ عشان تذوب ، لو الشكولاته مصنعة صح المفروض تذوب شوي شوي على حرارة الجسم ماتذوب بسررررررعة زي ( جلكسي مثلا ) تذوب شوي شوي ، الحين ذوقيها وشوفي وش النكهات اللي فيها وبتكتشفين أشياء غريبة والله . كل واحد يعجبه نوع غير الثاني جربي وشوفي وش النوع اللي يعجبنك أكثر .
أرجوا عاد محد يسألني الحين عن أحسن نوعية شكولاته بعد الشرح هذا !! كل المعلومات عندكم و أنتم ذوقوا و جربوا وش أحسن نوع .
الحين نرجع للموضوع ….
تارت الجاناش
Chocolate Ganache Tart
المكونات للعجينة الحلوة :
- ١ ونص كوب طحين
- أصبع زبدة دافي
- ١/٤ كوب سكر
- بيضة
- رشة ملح
مكونات الجاناش :
- ٣٤٠ جرام شكولاته غامقة !! من نوعية جددددددددا ممتازة
- نص إصبع زبدة دافيه مقطعة
- ثلاث ملاعق كبيرة سكر
- رشة كبيرة ملح
- كمية قشطة خفق من نوعية جيدة تكفي إنك تسوين جاناش خفيف . راجعوا موضوع الماكرون للي ما يعرف وشو الجاناش الخفيف .
الطريقة :
أول شي نخلط السكر و الزبدة إلين ما تسير ناعمة طبعا هنا راح نستخدم ملعقة خشب عشان ما ندخل هواء كثير عالخلطة .
بيسير شكلها زي كذا ….
بعدين إخلطي البيضة مع الخليط اللي فوق و أخلطي مرة ثانية . شكلها راح يكون غريب في البداية بس بيظبط بعدين .
الحين إخلطي معاهم الطحين و الملح و إخلطي إلين ما ينخلط الطحين معاهم بس لا تزودين خلط ولا بتيك مشكلة بعدين …. إنتبهي إخلطي بس إلين ما تلاقين تقريبا كل الطحين إنخلط ويسير شكله زي كذا …
الحين جمعي العجيمة و إعجنيها بسسسس شوي هدفنا هنا إننا نغلف الطحين بالزبدة بس موب نعجن نعجن بس شوي . حوالي ٣ مرات يكفي …
بعدين شكلي العجينة على شكل مربع و غلفيها بنايلون و حطيها في الثلاجة أقل شي نص ساعة .
بعدين طلعي العجيمة من الثلاجة وإبدي أفرديها … أول شي رشي شوي طحين على الطاولة ، حطي فوقها العجينة بعدين إفرديها وكل شوي حاولي تدورين العجينة ربع دورة عشان ما تلصق وعشان تنفر وتسير دائرة ، يعني لا تحركين يدك بكل الجهات عشان تسوين الدائرة لأ حركي العجينة نفسها .
طبعا العجينة هذي مليانة زبدة وكل ما دفت كل ماصارت صعب تشتغلين عليها عشان كذا كل ما لقيتي إنها بدت تسير لينة حطيها على صينية مرشوشة بطحين وحطيها في الثلاجة أو الفريزر بس شوي .
إفرديها إلين ما تسير أكبر شوي من حجم صينيتك حقت التارت زي كذا .
الحين شيلي العجينة وحطيها في صينية التارت و رصيها زيييييين ولو إنشقت ترا عااااااادي خوذي قطعة عجين زايدة و زينيها العجينة ذي حبييييييييييييبة ترى .
تأكدي إنك تضغطين العجينة على الأطراف عشان تعطيك الشكل الحلو .
الحين رجعي الصينية للثلاجة مع العجينة حوالي ساعة .
بعد ساعة شغلي الفرن على حرار ٣٧٥ فهرنهايت . و بعدين طلعي الصينية من الثلاجة وخرمي العجينة بالشوكة في أماكن متفرقة عشان يطلع الهوا من العجينة وهي في الفرن .
الحين الخطوة الغريبة على ناس كثير …..
غطي الصينية بورق زبدة أو قصدير و إمليها حبوب أو رز عشان يمسك القصدير زي كذا ..
وحطيها في الفرن حوالي ١٣ – ١٥ دقيقة . بعدين طلعيها من الفرن . شيلي ورق الزبدة و الرز أو الحبوب و رجعيها الفرن ٥ – ١٠ دقايق إلين ما تكمل طبخ وتبدأ تقلب بنية .
طيب ليش سوينا ذي الخطوة ؟ عشان لو ما سويناها راح تستوي العجينة من برا بس تكون نية من جوا .
الحين خلي القشرة تبرد شوي عبال ما تسوين الجاناش .
طريقة الجاناش منيب عايدها موجودة في موضوع الماكرون طبقوا اللي تعلمتوه .
طبعا لو تبين يمديك تطعمين الجاناش بأي شي ( بندق ، نعناع ، برتقال ، ملح ) أو لو عندك أنتي شي تبين تطعمينه فيه .
بعد ما تبرد القشرة صبي الجاناش جواها و خليها تبرد أقل شي ساعتين إلى يومين في الثلاجة بعدين رشيها ببودرة كاكاو و شكولاته مبشورة وذوقي أحلىىى تارت .
ملاحظة : أنا أستخدمت هنا صينية تارت من النوع اللي تنشال القاعدة حقته تلاقونها موجودة بس لو موب موجودة أي صينية تنفع .
حجم الصينية اللي أستخدمتها هنا ٩ إنش ، لو صينيتكم أكبر إنتبهوا يمكن العجينة ما تكفي ويمكن الحشوة ما تكفي .
يمديكم تسوون ٤ تارتات صغار بنفس العجينة ونفس الحشوة لو عندكم صحون التارت الصغيرة طبعا .
الوصفة الثانية بعد سهلة و صدقوني جربوها لا تقرون وبس جربوها منتب قادرين تتخيلون طعمها أبدا ……
الوصفة هذي جدا جدا ممتازة خصوصا بعد وجبة دسمه كون الليمون اللي فيها يخفف من طعم الدسم كثيييييير .
هذي النسخة من الوصفة هي الأساسية بس طبعا يمديك تسوينها بأس نوع حمضيات .
تارت الليمون بالمرانج
Lemon Meringue Tart
هنا نستخدم نفس العجينة اللي فوق ، العجينة الحلوة . وبنحشيها ذي المرة بكرد الليمون و فوقها بنحط المرانج .
اللي ما يعرف وشو الكرد هو عبارة عن زبدة و بيض وليمون يعني بالعربي كسترد . ولو ذقتوه هنا بتعرفون إن له ألف مليون إستخدام هذا بس واحد منها عشان كذا حلو تعرفون طريقته .
المقادير :
للقشرة :
نفس اللي فوق .
للكرد :
- ٣ بيضات
- ٢-٣ ليمونات صفر كبار ، تشيلين القشر أول ( طبعا بس الجزء الصفر الأبيض مر إنتبهي ) بعدين تعصرينها ومفروض تعطيك ١/٣ كوب عصير ليمون لا أكثر و لا أقل .
- ٣/٤ كوب سكر
- ٤ ملاعق زبدة دافية مقطعة .
- ملعقة كبيرة تقريبا من بشر الليمون اللي فوق .
للمرانج :
- ٤ بياضات بيض خاااااالية من أي نقطة صفار …
- ١/٢ كوب + ملعقتين كبار سكر
الطريقة :
سويي القشرة بنفس الطريقة حقت الوصفة السابقة بس بتغير بسيط لا تشيلين الرز ذي المرة خليه يطبخ ٢٠ – ٢٥ دقيقة وبعدين طلعيه من الفرن .
بعد ما تقظين نزلي حرارة الفرن ل ٣٥٠ ….
و أنتي تسوين القشرة سويي الكرد ..
الكرد :
حطي العصير و البشر و الزبدة في قدر صغير و خليه يغلي .
بنفس الوقت حطي البيض و السكر في صحن معدني و أخفقيهم مع بعض إلين ما يفتح لو البيض .
بعد ما يبدأ يغلي العصير صبيه على البيض شووووووي شووووي إنتبهي تصبين بسرعة … طبعا بس في البداية بعدين عادي صبيه كله وحركي ….
الحين رجعي الخليط للقدر على حرارة وسط مع التحريك المستمر بس شوي شوي و تأكدي تمسحين أهم شي قاع القدر إلين ما يبدأ يغلي الخليط يعني أول ما تطلع فقاعة هوا من الخليط طفي النار على طول صفيه بصفاية في صحن معدني .
الحين لو كنتي تسوين شي ثاني حطي ذا الخليط في الثلاجة إلين يبرد زيييييييين . بس الحين إحنا نبيه حار .
صبي الخليط في قشرة التارت اللي سويناها ورجعيها الفرن إلين ما تبدأ شوي تنشف بس لسا تهز في الوسط حوالي ١٠ دقايق أو أقل .
الحين سويي المرانج :
بخلاط كهربائي إخلطي البيض على أعلى سرعة إلين ما يبدأ يسير رغوة بعدين إبدي حطي السكر شوي شوي إليييييييين ما ينفش مرررة ويوصل مرحلة منقار الطير ( زي الماكرون ) .
الحين بالملعقة غطي التارت بالمرانج ، لو تبين تقدرين تستخديمن كيس الكريمة وتسوين أشكال رهييييييييييييييييييبة أو حتى تقدرين تسوين أشكال بالملعقة . أهم شي تأكذي إنك غطيتي كلللل شي زين . بعدين رجعيها الفرن حوالي ١٠ – ١٥ دقيقة أو إلين ما يتغير لون المرانج شوي .
النتيجة المرانج بيسير شوي يقرمش ويشبه المارشملو و اللي تحته طري وطعمه ليمون . صدقوني والله منتب نادمين .
طبعا ما عليكم من الصور حقتي هذا نفس التارت بس بطريقة المرانج الإيطالي كنت ناوي أحطه بس داري أغلب الناس ما عندهم ميزان حرارة .
على العموم هو نفس الطعم تقريبا بس أريح في التقديم لا أكثر ….
هنا أنا حرقته بدافور وهذا سبب ثاني كوني داري إن فيه كثار ما عندهم . بس لاحظي إنك تشوفين الكرد ، بس في حالتكم لازم تغطونه زين .
ما أكذب عليكم والله بس أكثر حلى يطلبون مني الناس أسويه هو هذا .
ما يحتاج أشرحلكم ليش رهيب بس المكونات تمشي مع بعض المسأل بهذي البساطة .
تارت الموز مع الفانيلا و الزبدة البنية
Banana , Vanilla and Brown Butter Tart
هنا بستخدم العجينة المتفتتة وهي أسهل من الأولى بشوي .
المقادير :
للعجينة :
- كوب وربع طحين
- ١/٢ كوب زبدة دافية
- ١/٣ كوب سكر
- صفار بيضتين
- رشة ملح
- ورشة فانيلا سايلة
للتارت :
- ٦ صفارات بيض
- ٣/٤ كوب سكر
- أصبع ونص زبدة
- عود فانيلا طازة ( لو ما عندك الله يعين عاد مالك إلا السايلة ولو إنها ماراح تعطي ولا نص الطعم )
- عود قرفة
- رشة ملح
- ١/٢ كوب طحين
- ٣ موزات مستويات
الطريقة :
أخلطي السكر و الزبدة و الملح إلين ما تنخلط ( بخلاط كهرب لو تبين بس على أقل سرعة ) ، بعدين حطي الفانيلا و البيض و أخلطي شوي ، بعدين الطحين و أخلطي بس شوي ما يحتاج أشرحلك .
الحين جمعي العجنة بيدك ( ما يحتاج تعجنينها هنا ) و شكليها على شكل مربع و غلفيها بنايلون وحطيها في الثلاجة نص ساعة تقريبا .
الحين طلعيها من الثلاجة و أفرديها بس شوي . لا تحاولين تفردين العجينة هذي جدا صعب أفرديها شوي بس و بعدين رصيها في الصينية رص جدا سهلة .
الحين رجعي الصينية في الثلاجة ل نص ساعة إلى ساعة .
سخني الفرن على ٣٢٥ وبعدين حطي الصينية بعد ما تسوين فيها زي ما سوينا فوق ( تخرمينها بشوكة و بعدين تغطينها بقصدير و تحطين وزن مثل الرز فوق ) .
لمدة ١٣ دقيقة تقريبا .
شيلي القصدير أو ورق الزبدة وكملي طبخ ٢٣ – ٢٥ دقيقة أو إلين ما تقلب بنية .
طلعيها من الفرن وخليها تبرد أقل شي نص ساعة .
بس هذي طريقة القشرة …
الحين للحشوة :
أول شي حطي صفار البيض و السكر و الملح في صحن معدني و أخلطيهم زين .
بعدين في مقلة على حرارة وسط حطي الزبدة و القرفة و عود الفانيلا المقسوم ( لو كنتي تستخدمين فانيلا سايلة حطيها مع البيض ) و إنتظري إلين تقلب الزبدة بنية ! بنية موب معناها سوداء. بعدين شيليها من النار وشيلي الفانيلا و القرفة . بعدين صبي الزبدة شوي شوي على البيض مع التحريك المستمر .بعدين حطي الطحين وحركيه شوي بس .
الحين قطعي الموز حلقات حوالي ١/٤ إنش ورصيها في القشرة زي كذا .
صبي الخليط فوق الموز ووزعيه زين بعدين رجعيها الفرن حوالي ٣٥ دقيقة أو إلين تبدأ تقلب بني .
بعدين شيليها من الفرن وخليها تبرد نص ساعة على الأقل قبل التقديم .
بعد ما تبرد رشيها بسكر مطحون وقدميها مع إسكريم فانيلا لو تبين وصوص كاراميل .
أنا هنا مقدمها مع موز بروليي ، إقسمي موز نصين غطي الوجه بسكر وإحرقيه بدافور . تنفع مع فواكه ثانية مثل الخوخ و التين . ومقدمها مع صوص كاراميل شغل بيت و إسكريم صحححح شغل البيت بعد …
طبعا التارتات أكثر بكثير من ثلاثة بس أنا لي طاقة في الكتابة بعد …. فيه تارتات مالحة وفيه تارتات حلوة بعد زود والأمثلة كثير بس هذي أنا بالنسبة لي أموت فيها وعشان كذا حطيتها هنا .
إنتهى ……..
اترك تعليقاً