المشاركة الأصلية كتبت بواسطة حلا شموااهـ
السلام عليكم
كيفكم يااحلى شموآآآآآآئياات
سؤااالي
كيف انظف اللحم واقضي على زفرته؟؟؟؟؟؟؟؟؟ مررررة معقدني
طبعا انا استخدم افضل نوع لحم اللي هو نعيمي طاااازج ومع ذلك احس في ريحه
الريحه اللي اقصدها لما اطبخ اللحم واجي باكله اشم له ريحه ^^^مدري فيني وسواااس والا وشووو
جربت افركه بملح خشن ولا في فايدة
جربت الخل ولا في فايده
جربت اتبله بالكركم والملح الخشن
جربت ادعكه بليمووووون
جربت اسلقه واشيل الزفرة ثم اضع البصل مع الهارات الصحيحه وقطع بصل كثيرة ولا في فااااايدة
وش الحل
السؤال هو من وين تشرين اللحم ؟ نوعية اللحم صح مهمة بس الأهم إن اللي يبيعك إياها يحافظ عليها طازجه إلين ما توصل مرحلة الطبخ . كثير ناس يهملون هذا الموضوع ويعتبرونه موب مهم بس الحفظ الصحيح للحم شي أساسي موب بس عشان الريحة ! لأ الطعم و الأهم من هذا الأمراض اللي ممكن تجيك لو اللحم ما أنحفظ صح .
بعد ذبح أي حيوان يبدأ جسمه يتحلل و تبدأ بكتيريا تعيش عليه وهي اللي تعطي هذي الريحه في الغالب . البكتيريا تبطأ حركتها في الجو البارد (ما تموت ! بس تبطأ حركتها ) بينما تشتغل بسرعه وتتكاثر بعد بسرعه في الجو الدافي أو الحار .
عشان كذا من يوم ينسلخ ويتقطع الحيوان لازم علطول تشوفين لك حل في التخزين . يا تطبخينه كله مره وحده ( شي شبه مستحيل دايما ) . يا تحفظينه لفترة قصيره في ثلاجة باردة ( حوالي ٥ أيام ) . أو مالك إلا الفريزر يقعد ل ٦ شهور .
طريقة التخزين هي إنك تحطينه في كيس ناشف !! وبعد حاولي لو قدرتي أكثر من طبقه عشان ما يخرب في الفريزر .
إذا جيتي تذوبين اللحم عمرك ، عمرك لا تحطينه برا الثلاجه وقت طويل !! صح بيذوب أسرع بس بعد فيه وقت يخرب . دايما خليه يذوب في صحن في الثلاجه وشيلي بين فترة وفترة المويه اللي تنزل من الذوبان عشان بعد ما تطلع ريحه .
الناس دايما تهمل الفترة من يوم يموت الحيوان إلين يدخل الثلاجة ... لازم بسرعه أحياانا الخروف ينذبح في الفجر ويتعلق في المسالخ بدون أي تبريد !!! طول اليوم إلين تشرينه المغرب بعدين تنقلينه البيت و تقطعينه عالعشاء ! يعني ١٢ ساعة تقريبا بدون أي ثلاجه !! أكيد طبعا في ذي الحاله ريحه ، وطعم أستغفر الله .
لا تدورين حلول غريبة مثل الملح و الخل و ستمية نوع بهار عشان تشيلين الطعم هذا ! اللحم في الأساس دايما لازم يكون لذيذ لدرجة إنك تكونين مستعدة تاكلينه ني ! الريحة موب حلها إنك تغطينها ! الحل إنك تدورين وين المشكلة وتعالجينها
كيف اقضي على زفرة اللحم
