Top Chef Recipes ●● وصفات توب شيف ||

[ضيفة]

السلام عليكم ورحمة الله وبركاته

،,

بعد أطلاعي على الأجزاء الثلاث لأسئلة المطبخ لقيت وصفات وايد للأخ Top Chef
البعض منها نزل لها تطبيقات والبعض لا ، لاحظت أنه بنات وايد يسألون التوب شيف
عن وصفات هو كتبها من قبل ومرات نفس الوصفة تنطلب أكثر من مرة .
عشان هذا كله وعشان ما نضيع وقت أخونا أكثر وعشان يقدر يتفرغ لإنزال مواضيع ثانية
والأهم حتى يكون لنا مرجع موحد لكل وصفات التوب شيف حاولت أجمع كل الوصفات
وأنزلها في ملف واحد نستفيد منه كلنا.

خواتي كلمة حق لازم تنقال تنسيق الموضوع كان للأخت Ro6bah و C H E E R Y
فياليت أي وحدة قرت الموضوع واستفادت منه ما تنساهم من دعائها
والشكر الأكبر طبعاً للأخ Top Chef اللي مهما تكلمنا ما بنوفيه حقه لكن ما أقول غير الله يجعل
كل تعبه وجهده وكتابته في هالمنتدى في موازين أعماله...ولأن من لا يشكر الناس لا يشكر الله أقول
جزاك الله خير
،,




[ الصوصات والتتبيلات ]




صوص الشوكولاته

· 150جرام بالتقدير موب شرط كل شي مضبوط ١٠٠٪ شكولاته غامقة
من نوعية ممتاااااااااااااااااااااااااازه مقطعه! أرجوك موب هيرشي
عشان ما ترجعين لنفس الشي هههه

• ١٣٠جرام حليب
• ٦٠جرام قشطة خفق
• ٣٥جرام سكر مطحون
• ٣٠جرام زبده على حرارة الغرفه
• رشة ملح

سخني القشطة و الحليب و السكر إلين توصل شبه غليه.
بعدين خليه يبرد حوالي دقيقة بعدين صبيه على الشكولاته المقطعه زي الجاناش
بعدين خليه دقيقة على الشكولاته وبعدين أخفقي إلين ينعم .
آخر شي أضيفي الزبدة الدافيه عشان تعطي لمعه .
طبعا الصوص راح يكون خفيف بس راح يثقل وهو يبرد .أحفظيه في الثلاجه حوالي أسبوعين إلى ثلاثة بالكثير .
وإذا طلعتيه عشان تستخدمينه حطيه في حمام مائي عشان يدفأ مره ثانيه .





طريقة صنع التوفي

كمية سكر + نص الكمية مويه + نفس كمية السكر قشطة خفق ،طبعا هذا عشان تحفظينها بعدين

• كوبين سكر
• كوب مويه
• كوبين قشطة خفق
• ملعقة كبيرة عسل( إختياري بس إجراء إحتياطي )

نكهات لو تبين : جربي معاها قشر برتقال ، فانيلا ، ملح أو الثلاثة مع بعض.
حطي السكر و المويه في قدر ثقيل على حرارة وسط إلى عالية
إذا بدت تغلي غطي القدر عشان الموية اللي تتكثف على الغطاء تمسحلك جوانب القدر شفتي الذكاء.
بعد دقيقتين شيلي الغطاء وخليها تغلي لا تحركينها أبببببدا
إلين ما يبدأ يتحول لونها ذهبي . الحين هزي القدر شوي شوي عشان اللون يتوزع صح إلين ما يوصل لدرجة الكراميل اللي تبينه .
كل ما طبخيته كلما صار مر أكثر بس طبعا نكهته معقدة تسير لو تحبينه حلو مرررة لا تخلينه يلون مرة أنتي بكيفك .
طفي النار وصبي القشطة مع التحريك المستمررررررر
طبعا إنتبهي لاتحرقين يدك تراه حااااااااااااااااااااااار وتراه بيغلي بقوة .
الحين خليه يبرد وبتلاقينه بدا يثقل زود.
يمكن تترطب مع الهوا موب بس الكراميل ؟ طبعا لوبيتكم رطب ....
جربي تقللين السكر في الخلطة حقتك يمكن تتحسن السكر يسحب الرطوبة
من الأشياء اللي حوليه عشان كذا لو كمية السكر كبيرة أحيانا يخلي الأكل يترطب أسرع .





صوص دوتشي دي ليتشي

على العموم بعطيك أحسن طريقة لها :

• لتر حليب
• كوب ونص سكر أبيض
• عود فانيلا لو عندك أو رشة فانيلا سايلة
• ١/٢ملعقة بيكنج صودا

أخلطي الحليب و السكر و الفانليلا في قدر ثقيل على حرارة وسط
إلين يبدأ يغلي غليه خفيفة مع التحريك إلين يذوب السكر زين .أضيفي البيكنج صودا
وخليه يغلي غليه جدا جدا خفيفة حوالي ساعة ونصإلى ساعتين أو إلين يقلب لونه بني غامق ويثقل
. صفيه بعدين أحفظيه في الثلاجة حوالي شهر .





صوص الدونات

• ١/٤كوب حليب سخنيه في قدر إلين ما يسخن شوي
• بعدين حطي عليه كوبين سكر مطحون و أخلطي

غطسي الدونات في الخلطة وهي حارة وحطيها على شبك عشان تبرد .
لاحظي إن الخلطة هذي راح تجمد بسرعة لو بردت
فأفضل شي تشيلينها من النار وتحطينها في صحن فوق حمام مائي.

يتبع●●◄

[ضيفة]

صوصو الترتار

أسهل شي إنك تخلطني مايونيز + ليمون + كابر + ثوم + فيليه أنشوجه لو تبين .

بس هذا الترتار صوص ..

التابيناد

جدا سهل ... وفي مثل هذي الأشياء مجرب موب المشكلة كونه عمرك ما تمشين عالكميات بالضبط !! خلي لسانك هو الحكم ذوقي وعدلي لأن كل زيتون غير .

• كوب زيتون نيسواز بدون بذر
• كوب زيتون أخضر ويفضل لو كان من نوع Picholine الفرنسي
• ١/٤كوب طماطم مجففة
• ملعقة كبيرة كابر
• فص ثوم
• فيلية أنشوجة
• ١/٢ملعقة ريحان مفروم
• ١/٢ملعقة أوريجانو مفروم
• ملعقة كبيرة بقدونس مفروم
• ١/٤كوب زيت زيتون

أخلطي كل شي بالخلاط المولينكس إلا الزيت .. شوي شوي إلين ينفرم بعدين أضيفي الزيت وكملي خلط شوي شويهذي أحسن تابيناد ذقتها في حياتي ...
بس طبعا إذا شي ما عندك شيليه و إذا شي تبين تحطينه زيديه ..
إذا شي تحبينه حطي أكثر و إذا شي تكرهينه حطي أقل ..التابيناد شي شخصي زي البيستو موب قرآن منزل ...
. بس حاولي ما تشطبين نص المقادير ثمن تقولين والله عاديه

صوص البلسمك

إطبخي كوبين من البلسمك على نار وسط إلين ما يثقل ويسير زي الدبس وإستخدميه فوق الدجاج ، الستيك أو حتى مع الحلويات فوق الفراولة مثلا أو التين .
جربيه حتى كصوص فوق الإسكريم ، صدقيني منتب مصدقة كيف طعمه بيسير حلو وموب حامض أبدا .
إطبخي فيليه سمك مع شوي زبدة في مقلة بعدين شيلي السمك و إطبخي شوي زبدة إلين تقلب بنيه ، بنية بس موب سودا
وبعدين إخلطي معاها شوي بلسمك و قدميها مع السمك.
صوص ثاني أسهل من الأول و بعد شي رهييييييييييييييييب . بعد ما تشيلين الدجاج أطبخي شوي بصل أو ثوم أو الإثنين لو تبين بعد شوي بس
بعدين صبي حوالي كوب خل بلسمك وخليه يثقل شوي .... مافيه أسهل من كذا.

صوص السيزر

الصوص(صفار بيضة + عصيرليمونة + فص ثوم + ربع كوب بارمزان
سمك أنشوجة + صوص الوستشير + زيت زيتون)

الصلصة الفرنسية

• 1/3 كوب خل عنب أبيض
• ١/٣كوب سكر
• ١/٢كوب كتشب
• ١/٢كوب زيت زيتون
• ملعقة كبيرة خردل يفضل لو خردل ديجون
• ملعقة صغيرة بودرة ثوم
• ملعتقين صلصة ويستشير صوص
• ١/٤كوب بصل مقطع صغاااااار أو مبشور لو تبين
• ملح وفلفل

حطي المقادير كلها في خلاط و أخلطي

الكاتشب

• علبة كبيرة ( كبيرة موب وسط ولا صغيرة ) طماط كامل
• بصلة مقطعة
• 4فصوص ثوم مقطعة
• ملعقتين كبار زيت نباتي
• ملعقة صغيرة فلفل حار بودرة
• نص ملعقة صغيرة بابريكا
• ربع ملعقة صغيرة قرفة
• ربع ملعقة صغيرة all spice مدري وش إسمه بالعربي والله
• ملح وفلفل
• ملعقة كبيرة معجون طماطم
• ١/٢كوب سكر بني فاتح
• ١/٢كوب خل تفاح

أول شي أخلطي الطماط في خلاط , بعدين أطبخي البصل مع رشة ملح في الزيت

إلين يقلب ذهبي شوي بعدين حطي الثوم و أطبخيه شوي زود. حطي البهارات وأطبخيها يمكن دقيقة
بعدين حطي الطماط و معجون الطماط وباقي الأشياء وخليها تطبخ على غلية خفيفة يمكن ٤٠ - ٤٥ دقيقة مع التحريك المستمر
.بعدين أخلطيها بالخلاط إلين تصير ناعمة .. بس !!!

الباشاميل

بإختصار الباشميل له طريقتين لا ثالث لهما ...بس كلها تبدأ بنفس الطريقة :

أول شي تذوبين زبدة + طحين ( الأصل فيها الزبدة وهي أطعم شي طبعا بس زيت ينفع ولو إنها ما تصير بعدين بشاميل بشاميل !)
كمية الزبدة للطحين ناس يقولون نفس الكمية ! بس هذا خطأ !!!
كل طحين غير أهم شي إنه يكونلك معجون ناعم وشوي ثقيل وعدلي أنتي عليها مع الوقت
بتعرفين كم تستخدمين . بس أحسن طريقة هي إنك تبدين بنفس الكمية من الطحين للزبدة
تذوبين الزبدة بعدين تحطين الطحين شوي شوي بالتدريج إلين يوصل للمرحلة اللي ذكرتها فوق
يمكن تحتاجين كل الطحين ويمكن لأ ...
الحين تطبخين هذا المعجون عشان تشيلين طعم النشا من الطحين
طبعا كل ما طبختيه كل ماتغير طعمه ولونه وقوة تثقيلة .
مع الطبخ بيتحول إلين أشقر بعدين بني بعدين أسود بعدين فححححم !! بس ياخذ طبعا وقت .
وكل ما طبختيه بتقل قوة التثقيل حقت المعجون هذا .
طبعا في حالة الباشاميل راح تخلين المعجون يكون من أبيض إلى أشقر لا أكثر ! .
هذاالمعجون بتسمعيني كثييييييييييييير أتكلم عنه لأنه وحده من أساسات الطبخ الفرنسي ويسمونه "رو" roux .

الحين نجي للباشاميل وهو له طريقتين لا ثالث لهما :

الحل الأول ( طريقة الصحن الواحد ): إنك تسوين المعجون اللي فوق وتصبين الحليب حقك شوي شوي
يعني تصبين أول دفعة حليب مع التحريك بسرعة طبعا وتخلينها إلين تبدأ تغلي
بعدين تحطين الدفعة اللي بعدها وكذا . طبعا نخليها تغلي قبل لا نحط الدفعة اللي بعدها
لأن المعجون هذا roux ، ما يبدأ يثقل إلا على حرارة عالية قبل الغليان بشوي .
آخر شي لازم تعرفين إن الصوص راح يثقل زود إذا برد فدايما أحسبي حساب ذا الشي .
الشي الثاني هو إن بعد ما تخلصين الحليب خليه يغلي على غلية هادية حوالي ٥ دقايق إلين تشيلين طعم النشا من الطحين .

الحل الثاني (طريقة الصحنين ) : هو إنك تسوين المعجون زي فوق بعدين تكونين في صحن ثاني مخلية الحليب يغلي على غلية خفيفة . أول ما تخلصين من المعجون
صبي الحليب مرة وحده عليه وخليه يغلي زي فوق بالضبط .هذا هو الباشاميل وطبعا زي دايما النكهة
حطيهاعلى كيفك.

بس الباشاميل الأصلي : تسلقين مع الحليب ( في الطريقة الثانية ) نص بصلة + فص ثوم + ورقة غار .
و آخر شي تضيفين ملح + فلفل + رشة جوزة طيب .
هذا هو البشاميل الأصلي بس أبدعي أنتي وألفي وغيري بالنكهات على كيفك .

تتبيلة رجل الخروف

خردل ديجون + ثوم + روزماري + ملح خشن مطحون ( يعني موب ساسا ) وفلفل بعد خشن مطحون + زيت .
أخلطيهم مع بعض وسوي فيها زي المعجون بعدين
أدهني الرجل فيها،خليها تتبل في الثلاجة طول الليل . بعدين ثاني يوم طلعيها من الثلاجة
قبل بساعتين وخليها برا الثلاجة إلين توصل لحرارة الغرفه . بعدين شغلي الفرن على حرارة عاليه عشان تحمرين اللحم أول شي ، يعني ٤٢٥ تقريبا .
حطي اللحم في الفرن في الرف الأوسط وخليه إلين يتحمر شوي تقريبا ربع إلى نص ساعة بعدين نزلي الحرارة إلى ٣٥٠ وخليه يكمل طبخ إلين يستوي .

تتبيلة الدجاج المشوي

التتبيله زي ما قلت ترى مهيب هي الأساس الأساس هو في كيف تشوينها يعني لا تعتقدين إن التتبيله هي سر الدجاج الصح .
أي نكهة في راسك تقدرين تسوين منها تتبيله
( أول أكله أسويها في حياتي على فكرة ) . تبين تتبيله إيطاليه ( ليمون + ثوم + ريحان ) بس !!
تبين هنديه ( ليمون + كزبره + زبادي + فلفل + كمون + هيل ) تبين صينيه ( صويا + ثوم + زيت سمسم )
وكذا !!!! موب مهم التتبيله ومالها مقادير معينه أهم شي تكون حمضيه ، معاها شوي زيت ، وشوي ملح بس.
غالبا الدجاج اللي يجي مشوح يكون متبل ببهارات بسيطة مثلا ملح وفلفل بس
أو أعشاب بعد بسيطة لأن الطعم بيجي من الصوص اللي يتقدم معاه . بس في حالة الشوي هذا شي ثاني .
عندك خيارين يا تسوين تتبيلة رطبه غالبا يكون معاها شي حامض + نكهات أو إنك تسوين مسحة أو تتبيله ناشفه ترشينها على الأكل قبل تشوينه .
الإثنين ممتازات وكل واحد له ميزاته .بالنسبة للتشريح ، الهدف منه هو إنك تطبخين الدجاج أسرع لاغير ما فيه سبب ثاني له
بس في نفس الوقت لا تنسين كونه يطبخ أسرع يعني إنه أسهل تحرقينه وتنشفينه !! .
الحل الثاني هو إنك تحطين الدجاج في كيس أو تغطينه بنايلون و تضربينه ضربا مبرحا إلين ينفرد شوي .
والحل الأخير هو إنك ما تسوين فيه شي وتشوينه زي ماهو .
الخيار راجعلك أنتي وش تحبين، أنا أفضل الخيار الثاني لأنه مايجي اللحم كبير مره
ولا يجي نحيف ومنحرق بس أنتي جربي وشوفي وش تحبين...
تبلي الدجاج ، بخردل ، ثوم ، ملح وفلفل ، ليمون وقشر ليمون ، زيت زيتون و نعناع
ساعتين تقريبا أو أكثر بعدين نشفي الدجاج وحطيه في صينية وبعدين على الفرن على ٣٧٥
ما أعتقد فيه أسهل من كذا .

صوص كريمة الفطر :

· ١/٤كوب فطر طازج
· بصله مقطعه صغار
· ١/٢كوب مرق دجاج(موب ماجي)
· كوب قشطه خفق
· ٣ملاعق زبده .

بعد ما تطبخين الدجاج ... شيليه ، بعدين حطي النار على أقل من وسط وحطي الزبده بعدين أطبخي البصل شوي بس إلين يذبل موب يقلب بني !!
بعدين حطي الفطر و أرفعي الحرارة على أعلى شي و أطبخي الفطر إلين يقلب بني مع رشه ملح وفلفل .

الحين نزلي الحرارة و حطي المرق ، خليه يطبخ إلين تقريبا يختفي ويبقى بس شوي بعدين حطي الكريمة
وخليها تطبخ إلين توصل للدرجة اللي تبينها . بس !!! زي أي مطعم ٥ نجوم !! موب إيكيا !!! .....
إيكيا الصوص حقهم مصنوع تقريبا نفس الطريقة بس بعد ما يطبخون الدجاج يشيلونه ويحطون البصل والثوم
بعدين مرق كثير ويخلون المرق يثقل إلين يسير زي اللون اللي شفتيه ، بعدين آخر شي يثقلونه بنشا بس.

يتبع●●◄

[ضيفة]

[الشوربات ]

شوربة العدس

• بصلة كبيرة مقطعة
• ٤فصوص ثم مقطعة شرايح
• ملعقة صغيرة كمون
• ورقة غار
• كوب عدس أحمر مغسول و تأكدي مافيه حصى
• 5أكواب مرق دجاج ( يفضل الله يرضى عليك بعدي عن الماجي)
• كوب مويه
• بقدونس و ليمون للتزيين

أطبخي البصل في زيت على حرارة هادية إلين يقلب شفاف .

أضيفي الثوم و الكمون و الغار و أطبخيه دقيقة زيادة بعدين حطي المرق و العدس و الملح و الفلفل
أطبخيها 30 - 45 دقيقة .

الحين لو تحبين أطحنيها أو أطحني نصها وخلي نصها و عدلي الملح و الفلفل و كثافة الشوربة على كيفك .
بعدين زينيها بالبقدونس .

شوربة الشمر والجزر

سمي جدا سهلة ومن أطعم الشوربات اللي ذقتها ، لا تنسين طعم الشوربة يتحسن

كل ما كان المرق أطعم وكل ما كانت المكونات طازه

• حبتين شمر القلب بس ، مقطعة شرايح ١/٤ إنش تقريبا .
• نص كيلو جزر مقطع حلقات نفس الحجم
• بصله كبيرة مقطعة أجنحة بعد نفس الحجم
• ٣فصوص ثوم
• تقريبا ٥ ملاعق زيت زيتون
• ١/٢ملعقة سكر
• ٤أكواب مرق دجاج
• ملعقة صغيرة من بذور الشمر

سخني الفرن على ٤٥٠ . بعدين حطي الخضار ورشيها بشوي زيت زيتون وملح وفلفل و سكر
في صينية فرن كبيرة،وحطيها في رف الفرن الأسفل وخليها تتحمر إلين تبدأ تلون شوي
حوالي ٢٥ - ٣٠ دقيقة وطبعا حركيها بعد نص الوقت عشان تستوي من تحت

بعدين حطي الخضار المحمرة في قدر كبير مع المرق وخليها تطبخ حوالي ٢٥ دقيقة
بعدين أطحني الشوربة . رجعيها على النار و عدلي الطعم لو تبين بالملح و الفلفل أو لو تبين زيدي مرق عشان تخففينها أو خليها شوي تطبخ عشان تثقلينها .

شوربة الطماطم الإيطالية

شوربة الطماط الإيطالية سهلة وهذي الطريقة أنا متأكد إنها راح تعجبك
بس أرجع و أقول دايما جودة الأشياء هي اللي بتعطي الشوربة طعمها .

• كيلو ونص طماط مشكل ( كل ما شكلتي أطعم حطي طماط صغار وكبار ولو عندك الطماط اللي يجي بالعرق حقه حطيه) .
• ٨فصوص ثوم
• بصلتين كبار مقطعة أجنحة
• ١/٢كوب زيت زيتون
• لتر تقريبا مرق دجاج
• ورقتين غار
• 4 ملاعق كبيرة زبدة .
• ١/٢كوب ريحان مقطع
• ٣/٤كوب قشطة خفق

أول شي سخني الفرن على 450 قطعي الطماط أنصاص
بعدين حطي الطماط و البصل و الثوم في صينية فرن كبييييييييرة

تأكدي إنها تكون مفرقة في الصينية موب كل شي فوق بعض .

بعدين رشي عليها ملح وفلفل و زيت زيتونحطيها في الفرن حوالي نص ساعة
أو إلين يبدأ يتكرمل شوي.بعدين في قدر كبير حطي الطماط المحمصة و المرق وورق الغار
و أطبيخها تقريبا 20 دقيقة .بعدين شيلي ورق الغار و حطي الريحان وبعدين أطحنيها .

رجعيها على النار بعدين عدلي كثافة وملوحة الشوربة على كيفك .
آخر شي حطي القشطة و الزبدة وحركي إلين تنخلط زين...زينيها بزيادة ريحان. .

شوربة الفطر بالشعير

• ٢كوب شعير حب
• كوب ونص مرق دجاج للشعير + ٤ أكواب مرق دجاج للشوربة .طبعا مرق دجاج يعني مرق دجاج موب ماجي !
• بصلتين كبار مقطعة
• فصين ثوم مقطعة شرايح
• عودين كرفس مقطعة صغار
• حوالي ٧٠٠ - ١٠٠٠ جرام فطر طاااااازج !!! ما ينفع أبدا أبدا أبدا هنا المعلب .. مقطع شرايح
• ٣ملاعق زبدة
• ملعقة زيت زيتون
• ملعقتين كبار طحين
• ملعقة كبيرة خل بلسمك أو شيري
• ١/٢كوب ساور كريم
• ١/٢كوب قشطة خفق

أول شي نطبخ الشعير في قدر صغير مع المرق حقه مع ربع ملعقة ملح على غلية خفيفة
حوالي نص ساعة أو إلين يلين.بعدين ذوبي الزبدة و الزيت في قدر وعلى حرارة وسط
أطبخي البصل و الكرفس إلين يذبل بعدين حطي الفطر و الملح والفلفل وعلي الحرارة
إلين أعلى شي عشان تلونين الفطر مع التحريك المستمر راح تاخذ شوي وقت العملية هذي
بعدين نزلي الحرارة مرة ثانيه للوسط وحطي الثوم و أطبخيه شوي بس،
بعدين حطي الخل + كوب مويه وحركي زيييييين مع مسح قاع القدر
عشان تذوبين كل القطع البنية اللي بتعطي الشوربة نكهتها .بعد ما يختفي السائل
رشي الطحين عليها وحركي زين حوالي دقيقة هذا اللي راح يثقل الشوربة .
الحين أضيفي المرق وخليها تغلي على غلية جدا خفيفة حوالي ربع ساعة.
الحين أضيفي الشعير المطبوخ و حركيه شوي و بعدين أضيفي الساور كريم و القشطة
وخليها تطبخ بس لا تخلينها تغلي أبدا !!! أو فيه إحتمال تفصل القشطة يعني أنتبهي .
آخر شي ذوقي الشوربة و تأكدي من الملح والفلفل. لو تبين أطعم بعد حطي فطر مجفف
لو لقيتيه راح يعطي نكهة فطر قوية.

يتبع●●◄

[ضيفة]

[ المقبلات والأطباق الجانبية ]

طماطم مجففه


أول شي تسوينه إنك تشرين كمية طماط من نوعية جيدة كمية كبيرة عشان تسوين كمية كبيرة،
حاولي تختارين طماط مستوي وطعمه جيد.
بعدين تقطعين الطمام أنصاص بالطول و ترصينهم في صينية وتخلين الوجه المقطوع فوق .
بعدين تقطعين ثوم وتخلطينه مع زيت زيتون وملح وفلفل .
طبعا هذي الأساسية بس أبدعي هنا حطي اللي تبين . وبعدين تدهنين وجه الطماط بهذا الزيت.
شغلي الفرن على ٢٠٠ فهرنهايت وحطي الطماط فيها ..
راح تاخذ حوالي ٨ ساعات عشان تنشف نسبيا .

لو تبينها شوي رطبة عشان تاكلينها خليها وقت أقل .

المسألة في النهاية على راحتك أحيانا أخليها ساعتين و آكلها كطبق جانبي و أحياناأخليها ٤ أو ٥ساعات .
بس إذا تبينها قريبة من الطماط المجفف خليها وقت أطول.بعد ماتخلطين خليها تبرد
و أحفظيها في علبة تتقفل حوالي أسبوع ،

أو لو سويتي كمية وتبين تحفظينها لوقت طويل

يمديك تحطينها في علبة أو مرطبان و تغطينها بزيت زيتون

طبعا تأكدي إن الزيت يغطيها

كونه هو اللي بيحفظها .

بعدين غطي العلبة وحطيها في الثلاجة، تقعد كذا الظاهر سنة ما عندك مشكلة.

البروكلي

طريقتي المفضله في البروكلي وخصوصا إذا كنت بسويه بدون صوص أو أي شي ...
طبعا نفس الطريقة تنفع مع الزهرة أو الهليون ( أسباراجس).
سخني الفرن ل ٤٢٥
بعدين قطعي البروكلي ورشيها بزيت زيتون + ملح وفلفل أسود + فص ثوم تقريبا لكل راس بروكلي.
ودخليها الفرن و أقلبيها بعد نص الوقت تقريبا ... بعدين رجعيها الفرن ..
بعد ما تستوي طلعيها ورشي عليها بارمزان مبشور وهي حاره شوي بس ... وذوقي أحلى طبق جانبي ...

البطاطا المهروسة

البطاطس المهروس ترى أسهل شي في العالم . قطعي البطاطس أرباع بعد ما تقشرينها .
وحطيها في قدر وغطيها بمويه باردة مملحة كثيييير يعني طعم الموية لازم يكون مالح .
بعدين خليها تطبخ بس على غلية جدا خفيفة إلين ما تستوي.
الحين صفي البطاطس وبعدين أهرسيها في نفس القدر لو تبين ،
فيه هراسه حقت بطاطس بس يمديك تستخدمين شوكة لو تبين .
لو عندك جهاز هرس البطاطا أستخدميه بيعطيك بطاطس نااااااااااااااااعمة .
بعد ما تهرسينها ، سخني في قدر ثاني قشطة خفق مع زبدة أول ما تغلي
شيليها من النار وأبدي صبي على البطاطس إلين توصل للدرجة اللي تبينها .
طبعا مافيه وصفة لأن كل واحد يحب البطاطس غير بس صدقيني سهلة .

لوتبين يمديك عاد تزيدين أي نكهات أنتي تبين عليه زيدي عليها ملح وفلفل إلين يعجبك طعمها

كراث ، بصل أخضر ، بصل مقلي ،جبن ، أي نوع خضار مثل البروكلي وكذا .

وبس هذي البطاطس المهروسة .

حلقات البصل

الطريقة سهل ، تنقعينها في لبن !!! موب حليب ! لبن ساعه أو أقل . بعدين تغمسينها في طحين مع النكهات اللي تحبين
بعدين في اللبن بعدين في الطحين مره ثانيه
بعدين تقلينها في زيت حار ٣٧٥ تقريبا لو عندك ميزان حرارة .

البطاطا المشوية ( المقطعة)

قطعي البطاطس وسخني الفرن على ٤٢٥ بعدين أخلطي البطاطس مع ملع وفلفل وزيت زيتون
وحطيها في الفرن بشرط ما تكون فوق بعض يعني في صينية بس كل بطاطسة بعيده شوي عن الثانيه،
خليها تطبخ إلين تصير تقرمش ويمكن تحتاجين تقلبينها . قدميها مع ساور كريم + كراث وشوفي ....

البطاطس المشوية (الكاملة)

بعد سهلة . سخني الفرن على ٣٧٥ بعدين أخرمي البطاطس بشوكه في مناطق متفرقة عشان ما تنفجر.
بعدين أدهنيها بزيت وملح بس !! حطيها بلفرن على الشبك بدون صينية
وخليها تطبخ إلين تلاقين إنها صارت لو دخلتي سكينة صغيره تطلع بسهولة و أستوت من جوا .
أفتحيها من فوق وحطي ساور كريم + زبده + كراث + جبن أي أي أي شي تحبين تقدرين تحطينه معها ...

المحار الأسود

جربي الأسود أول .... أسهل تحبينه ، لأنه شي رهيييييييييييييييب.
أول شي أنتبهي ترى اللي تشرينه كائن حي موب ميت !!! يعني لا تحطينه في الفريزر !! .
أول شي تسوينه هو إنك تحطينه في مويه دافيه حوالي نص ساعة عشان تنظفينه ،
بعد نص ساعة شيليه حبه حبه من المويه و بإسفنجه أفركيييه زييييييين عشان تشيلين أي أشياء عليه مثل طحالب أو كذا .
بعدين لازم تشيلين الشنب بتلاقين على الطرف زي الخيط طالع شيليه يعني أسحبيه إلين ينقطع ، سهل مايبيله شي .

الحين لو لقيتي أي حبه مكسوره أو مفتوحه لا تستخدمينها هذي تكون في الغالب ميته.

• زيت زيتون١٥فص ثوم
• ٤حبات بصل أخضر مقطع صغار
• كيلومحار
• كوبين طماط معلب
• نص كوب مويه
• ملعقتين صغار فلفل أحمرحار
• رشة أوريجانو و ريحان طازج لو عندك .

الحين في قدر على حرارة وسط سخني الزيت بعدين الثوم و البصل الأخضر ورشة ملح إلين يذبل بس
بعدين حطي الطماط و المويه و الفلفل . الحين حطي المحار إلين يغلي بعدين غطي القدر وخليه دقيقتين بس إلين يفتح المحار .
الحين أفتحي القدر طفي النار وحطي باقي المكونات و قدميه مع خبز .

يتبع●●◄

[ضيفة]

[ اللحوم والدجاج ]

الستيك

طريقة الستيك جدا جدا سهلة ترى لا تشيلين هم . بعطيك أسهل طريقة بنظري حاليا.
أول شي تسوينه إنك ترشين ملح وفلفل على الوجهين حقت الستيك
يفضل لوتستخدمين طاحونة الملح و الفلفل عشان تعطي قطع أكبر و ما يسير طعمهم قوي.
خلي الستيك يتتبل بالملح و الفلفل نص ساعة يمكن
بعدين نشفي وجه الستيك بمنشفة أو ورق نشاف أو منديل ثقيل زيييييين
بس لا تشيلين التتبيلة بس هدفي هنا هو إنك تشيلين المويه اللي على الوجه
عشان الستيك يتحمر صح...الحين سخني مقلة على حرارة أعلى من وسط بشوي
وحطي شوي زيت بس ( ما نبي نقلي الستيك ) تقريبا ملعقة كبيرة وشوحي الستيك
بس لا تقلبينه إلا مرة وحدة بس .حطي الستيك أول شي على الوجه الأول و أطبخيه
إلين تلاقين نقط دم طلعت من فوق بعدين إقلبيه على الوجه الثاني تقريبا
نص الفترة اللي قعد في الوجه الأول .أهم شي إنه ما ينحرق كل ما طبختيه أكثر
كل ما صار مطاط أكثر . أنا ما آكل الستيك إلا ووسطة دم .....
بس داري مستحيل تاكلينه كذا.....بعد ما ينطبخ الستيك لازم يتريح شوي
حطيه في صحن و حطي فوقه قصدير بس لا يلمس الستيك وخرمي الستيك شوي.
الحين سويي الصوص ، بنفس المقلة حقت الستيك صبي حوالي نص كوب خل بلسمك
و أطبخيه شوي على حرارة وسط إلين مايثقل شوي . قدميه مع الستيك.
قدمي الستيك مع خضار مسلوقة أو بطاطس مشوية أومقلية .




البيف ستروجونوف

• كيلو لحم بقر فيليه مينيوون مقطع صغار
• ٣ ملاعق زبده
• ٣/٤كوب بصل مقطع
• نص كيلو فطر طازج
• ٢ وربع ملعقة طحين
• ١/٣كوب مرق لحم
• ١/٣كوب قشطة خفق
• ١/٢كوب ساور كريم
• ملعقتين خردل يفضل خردل ديجون
• ملعقتين شبت وملعقتين بقدونس مفروم
• ملح وفلفل خشن

أول شي سخني مقلة على حرارة عاليه يفضل تكون ستانلس ستيل .
بعدين و المقلة تسخن نشفي اللحم زييييييييييين عشان يتحمر صح .
الحين تبلي اللحم بملح وفلفل بعدين حطي شوي زيت ( موب زيت زيتون )
في المقلة و أطبخي اللحم ولاتحركينه كثير عشان يتلون صح .
أطبخيه إلين بس يتلون ٣-٤ دقايق بعدين شيلي اللحم على صحن.
الحين شيلي الدهن الزايد اللي في المقلة بعدين حطي الزبده وعلى حرارة وسط
أطبخي البصل و حاولي تمسحين قاع القدر عشان يلين القطع البنية اللي فيها الطعم .
الحين أرفعي الحرارة شوي وحطي الفطر ورشة ملح وفلفل
و أطبخي الفطر إلين يتلون ١٠- ١٥ دقيقة تقريبا.
الحين رشي الطحين فوق الفطر و حركي ونزلي الحرارة إلى أقل من وسط
وحركيها حوالي دقيقة .الحين أضيفي المرق، القشطة ، الساور كريم ، الخردل ،
و المويه اللي نزلت من اللحم . وخليها تطبخ على غلية جدا جدا خفيفة إلين تثقل
لا تخلينها تغلي !!! أنتبهي .الحين رجعي اللحم للقدر مع الصوص
وبعدين أضيفي الأعشاب ذوقي الصوص و اللحم
وشوفي إذاتحتاج ملح أو فلفل بعدين قدمي.




الهمبرجر

طريقتي في الهمبرجر طال عمرك ، لحم ممتاز + ملح وفلفل بس !!!!!
أبغى طعم اللحم يبان موب يكون مغطى عليه ، أي نكهات ثانية أبغاها
ويفضل بعد ما تكون كثير أحطها في الخبز.
أنا غالبا أشتري اللحم بنفسي و أفرمه بالبيت لحم البقر طبعا هو الخيار الأول
لأن الهمبرجر معروف بلحم البقروغالبا أستخدم اللحم اللي يجيي من الرقبة أو الصدر
لأنها صح قاسية بس لذيذة بس بعد ما تنفرم تصير لينة.بكذا أتأكد إن اللي شريته هو اللي أبغاه
اللي في السوبرماركت يجمعون كل اللحم الباق يمن تقطيع اللحم ويفرمونه
أتبل اللحم بملح وفلفل بس !!! جربيها يوم وشوفي.
طريقة الطبخ ما يختلف عليها إثنين يا مشوح يا مشوي ،
كل واحد يعطي طعم شوي غير موب معناها إن واحد أحسن من الثاني !!! .
فيه ناس تقلي الهمبرجر !!!!!! ماأعتقد ينفع صراحة لأن كذا كثييييييييييييييير زيت يسير.
أنا شخصيا أفضل التشويح في مقلة بدون أي زيت كون الهمبرجر بيطلع منه زيت كثير .
حطي المقلة على حرارة وسط خليها تحتر شوي بس بعدين حطي الهمبرقر .
بعد شي ثاني أنا شخصيا آكل الهبرجر حقي أقل من نص إستواء كذا يجيك ليييييين ورطب موب ناشف .
طريقتي يمكن ما تعجبك بس أنا أشوفها الطريقة الوحيدة للهمبرجر .
كل واحد له شي يدوره إذا ما أعجبتك هذي جربي فيه غيرها كثير.




شاورما الدجاج

• تبلي صدور الدجاج قبلها بيوم ، بس خليها صدور كامله لا تقطعينها .
• كوب زبادي
• ملعقتين كبار عصير ليمون
• ٤فصوص ثوم مهروسة
• ١/٢ملعقة صغيرة شطة
• ملعقة كبيرة خل
• ملعقة كبيرة بصل مفروم
• ملح وفلفل
• زيت زيتون
• جوزة طيب

هذي تتبيلة أساسية بس لو تبين عدلي عليها على كيفك
وترى الكميات بس خطوط عامة يعني غيريها بعد على كيفك.
بعد يوم طلعي الصدور من التتبيلة . أنا أشويها في الفرن ،
الفرن فيه شواية من فوق شغليها وخليها تسخن زين بعدين أرفعي صينية الفرن على الرف العلوي .
شيلي شوي من التتبيلة حقت الدجاج يعني لا تخلين الدجاج مغطى بالتتبيلة
عشان ما تنحرق بالفرن ، حطي الصدور في الصينية وعلى الشواية
أطبخيها إلين تستوي و أقلبيها مرة هذي الطريقة تعطي نفس تأثير الشاورما العادية
بفرق بسيط هو إن الدجاج ما يجي ناشف زي الشورما العادي يجيك رطب .
الشورما لو لاحظتي دجاج مشوي لا أكثر ترى .
بعد ما يستوي الدجاج قطعية صغار وخلصنا !! لو تبين بعد يمديك تسوين معاها الخبز العربي.



البيكاتا

عالعموم سواء تبين تسوينها مغطيه بطحين بس ،( طحين بعدين بيض ) البيكاتا الأصلية و أنصحك تجربينها
أو بطريقة الميلانيزي ( طحين بعدين بيض بعدين بقسماط).
فيه أكثر من طريقة بس هذي الطريقة أنا دايما أسويها وهي جدا ممتازه .
جهزي حقت اللحم
أو حتى بالفراده حقت العجين إلين يصير كله نفس السماكه يعني كل صدر يكون متساوي .
نفس الشي للمعلوميه يمديك تسوينه بالديك الرومي أو حتىالدجاج ، بإنك تغطينه ب نايلون بعدين تضربينه بالمطرقة العجل .
بعدين جهزي الدجاج بإنك ترشينه بملح وفلفل أو أي أعشاب أو بهارات تبين
مثل الزعتر البري مثلا أو أي شي ثاني تحبينه بعدين كملي حسب الطريقة اللي أخترتيه.
سخني المقله على حراره وسط ، بعدين حطي زبده وزيت أو زيت لحاله لو ماتبين زبده و أطبخي الدجاج إلين يتحمر ويستوي الوجه الأول
بعدين أقلبيه إلين يستوي الوجه الثاني بعدين أنقليه لصحن إلين تسوين الصوص.

للصوص لكل ٤ صدورتقريبا :

• بصل أحمر مقطع صغاااار حوالي ملعقتين كبار أو حسب الرغبة
• فص ثوم مقطع صغار
• فطر مقطع شرايح (لازم طازج) حوالي كوب
• نص كوب مرق دجاج(موب ماجي)
• كوب قشطه
• ملعقة كبيره خل شيري ( إختياري)

بعد ما تطبخين الدجاج شيليه من المقله .. بعدين شيلي الدهن الزايدوبقي شوي بس كمية
تكفي إنها تغطي المقلة بدون ما تكون زايده .وبعدين أطبخي البصل بعد ما تنزلين الحرارة إلى أقل من الوسط.
أطبخي البصل إلين يذبل بعدين أرفعي الحرارة على أعلى شي وحطي ملعقتين كبار زبده و الفطر و أطبخيه مع التحريك بين كل فترة وفترة
إلين يتلون الفطر .الحين نزلي الحرارة لأقل من الوسط
بعدين حطي الثوم و أطبخيه إلينتطلع ريحته .بعدين حطي الخل وأخلطي شوي
بعدين حطي المرق و أمسحي قاع المقله زييين عشان تذوبين كل القطع البنيه اللي تكونت
من الفطر و طبخ الدجاج إلين ما يختفي كل المرق تقريبا ،
وبعدين حطي القشطه و خليها تطبخ إلين توصل للثقل المطلوب .
آخر شي ذوقيها وعدلي الملح و الفلفل وبعدين رجعي الدجاج للصوص
لو تبغين عشان ترجعين تسخنينه شوي .

يتبع●●◄

[ضيفة]

[ الأسماك والمأكولات البحرية ]




فيليه السمك


أسهل شي فيليه السمك تبليه بملح وفلفل بس .
طبعا أهم شي إشتري سمك طازة ونوعية ممتازة ، لو فيه ريحة معناها قديم .
تبلي السمك بعدين شوحيه بمقلة تيفال مع زبدة وترى السمك ما ياخذ وقت
أرفعي السمك بالملعقة إذا لقيتيه بدا يتفتت معناهاخلاص أستوى .
قدميه مع مايونيز مخلوط مع ليمون و بقدونس .




السلمون

أول شي تاخذين السالمون وتدهنين على الجلد طبقة زبده .. الزبده هي اللي بتعطي الجلد القرمشه اللي تميز جلد السالمون .
طبعا لو ما تاكلين الجلد ما يحتاج ذا الخطوة.
بعدين رشي على الوجهين ملح وفلفل ويفضل يكون ملح صخري موب ساسا وذا الطقة .
الحين سخني المقلة على حرارة أعلى من وسط بشوي
وبعدين حطي حوالي ملعقتين كبار زيت عادي موب زيت زيتون كونه ينحرق بسهولة .
نشفي السمك زييييييييين بمنديل قوي عشان يتحمر صح ( جدا مهمة الخطوة هذي )
بعدين أول ما تلاقين الزيت بدأ يطلع شوي دخان علطول حطي السمك جهة الجلد تحت .
و أطبخي السمك إلين يقلب الجلد بني بس ما يكون محروق حوالي ٦ دقايق أو أقل
بعدين أقلبي السمك وكملي طبخ الجزء الثاني.
السالمون أفضل شي لو إنطبخ بحيث يكون ذهبي على برتقالي من برا
بس شفاف من جوا يعني لا تطولين في طبخه .
كيف تعرفين إنه إنطبخ ؟ جيبي ملعقة وحاولي ترفعين السمكه من تحت إذا لقيتي إن اللحم
بدأ يتفتت أو يتفرق عن بعض معناها إستوى وعلطول شيليه من النار .
إذا لقيتي إن السمكه ماسكه في بعض وماتزال قطعه وحده خليها شوي زود.
السر في طبخ السمك هو إنك تختارين سمك زين ، يكون طازج ! وكل ماكان طازج أحسن
تتبلينه شوي بس بحيث ما تغطين على نكهته الأصليه وآخر شي تطبخينه صح
وأهم أهم أهم شي إنك ما تطبخينه أكثر من اللازم ..
. بس.أغلب الناس يكرهون السمك لإنهم ما ذاقوا سمك مطبوخ صح ! .




اللوبستر

أوكي تقدرين تشوينه ، تسلقينيه ، تطبخينه بالبخار ، بالفرن فيه كذا طريقة
أسهل وأفضل طريقة برأيي هي إنك تطبخينه بالبخار ، يعطي لحم ليين أكثر خصوصا إنه ميت .
جيبي قدر كبيييير وحطي فيه حوالي ٣ سم مويه وخليها تغلي مع ملح كثيييير .
بعد ماتغلي نزلي الحرارة بحيث يغلي على غليه خفيفة بعدين حطي اللوبستر وغطي القدر
خليه يطبخ وجهزي حمام مويه وثلج .
بعد ما ينطبخ شيليه من القدر وعلطول على الثلج عشان توقفين عملية الطبخ وما يسير ناشف
حوالي نص دقيقة بس عشان توقفين الطبخ.
الحين كيف تقسمينه ؟ حطي راس السكين على المنطقة اللي بين الذيل و الراس وأقطعي
بعدين أقطعي الجهة الثانية وبكذا تقسمينه نصين .
راح تلاقين أشياء خضراء (ويمكن أشياء برتقاليه لو كانت أنثى هذي بعد تنوكل
وجدا جدا غاليه ولذيذة ) جوا ،هذي الكبده ( جدا جدا لذيذة بس لا تاكلينها عشانه ميت !!! )
شيلي هذي الأشياء وكل الذيل و اللحم اللي في المقصات.
طبعا تسوين زبده ذايبة مع شوي بصل أخضر وليمون ! بس تغمسينه اللحم بالزبده.
وقت الطبخ للبخار ٢٠ دقيقة وهذا الحلو في الطريقة هذي كونه مايحتاج تعرفين أوقات الطبخ لكل وزن.
أوه شي ثاني لو تبين تسوينه شوي غير يمديك تطبخينه بالبخار ١٥ دقيقة بس بعدين تقسمينه نصين،
تدهنينة بالزبده اللي قلت عليها وبعدين تشوين اللحم بس شوي حوالي دقيقتين بس
عشان يعطيها طعم شوي لا أكثر .



المعجنات

كيش الفطر و السبانخ :
أول شي تسوين العجينة :

• كوب ونص طحين
• ملعقة صغيرة ملح
• ملعقة صغيرة سكر
• أصبع زبدة مقطع مكعبات حجمها حوالي ١ سم
• بيضة
• ملعقة صغيرة مويه باردة
• بياض بيضة

حطي الطحين و الملح و السكر في خلاط مولينكس ، بعدين حطي الزبدة الباردة و أخلطي شوي إلين يسويلك تكتلات .
بعدين حطي البيضة و المويه بعد ماتخلطينهم مع بعض .
الحين أبدي أعجني العجينة شوي بس !!!! يعني ٤ مرات لاأكثر بس عشان تخلطينها
موب عجن عجن زي الخبز . غلفيها بنايلون ورجعيها الثلاجة ساعةعلى الأقل .
الحين أفردي العجينة ورصيها في صينية التارت ( تكفي العجينة هذي تارت حجمها ١٢ إنش )
بعدين رجعيها الثلاجة ساعة ثانية .
الحين سخني الفرن على ٤٠٠ بعدين سووي زي ما سويت في موضوع التارت
حطي قصدير أو ورق زبدة و أملي العجينة بوزن مثل رز أو حبوب أو أي شي ثاني .
بعدين أطبخيها في الفرن ٢٠ دقيقة . بعدين شيلي الوزن و القصدير و خرميها بشوكة
و كملي طبخ تقريبا ١٠ دقايق أو إلين تبدأ تسير بنية.
الحين أدهني التارت ببياض البيض طبقة جدا خفيفة ، هذي عشان تمنع الرطوبة تتسرب للعجينة.


الحين الحشوة :

• ملعقة كبيرة ونص زبدة .
• ١/٣كوب بصل ذاك الفرنسي مدري لو تعرفينه يجي صغير و أحمر ، مقطع بس لو ما عندك ينفع بصل عادي .
• ١/٤كيلو فطر طازج لو سمحتي مقطع شرايح نحيفة
• زعتر بري
• ٣/٤كوب قشطة خفق
• بيضتين
• رشة ملح
• رشة فلفل
• بصلتين خضر مقطعة صغار
• نص كوب سبانخ .
• ملعقتين جبنة جريير .. Gruyere

الحين ذوبي الزبدة بعدين أطبخي البصل إلين يذبل بعدين حطي الفطر و الملح و الفلفل
وأرفعي الحرارة على أعلى شي ،أطبخي الفطر إلين يبدأ يلون وينطبخ حوالي ٨ دقايق
بعدين نزلي الحرارة و حطي السبانخ وقلبيها . بعدين شيلي الخليط من المقلة على صحن إلين يبرد.
الحين سخني الفرن على ٣٥٠ بعدين حطي الزعتر البري في قاعدة التارت
وبعدين الفطر و السبانخ،بعدين أخلطي القشطة مع البيض وملح وفلفل وصبيها على التارت
بعدين رشي فوقها الجبن والبصل الأخضر.
حطيها في الفرن إلين ما يجمد الكسترد حوالي ٢٥ دقيقة ، بعدين خليها ترتاح ربع ساعة قبل تاكلينها



يتبع●●◄

[ضيفة]

[ الحلويـات ]




مافن الشوكولاته

• ٣/٤أصبع زبدة
• كوبين طحين أبيض
• ٢/٣كوب سكر(المفن هذا موب مررررة حالي و صدقيني كذا أطعم)
• ٤أونصات أو ١١٣ جرام ،شكولاته غامقة من نوعية جدا جدا ممتازة ، إستخدمي شكولاته نسبة الكاكاو من ٦٤ - ٧٢٪ لا أكثر و لا أقل .مقطعة صغار مررة .
• ١/٣كوب شكولاته بودرة منخولة .
• ملعقة كبيرة بيكنج باودر
• ١/٢ملعقة شاي بيكنج صودا
• ملعقة شاي ملح
• واحد وربع كوب لبن كامل الدسم .
• بيضة
• ملعقتين شاي فانيلا سايلة .

شغلي الفرن على حرارة ٣٧٥ فهرنهايت .. ذوبي الزبدة مع نص الشكولاته في قدر صغير
الحين إنخلي المواد الجامدة كلها مع بعض معدا الشكولاته طبعا .
بعدين إخلطي المواد السايلة في صحن ثاني و أضيفي عليهم الزبدة و الشكولاته اللي سيحناها .
الحين إخلطيهم مع بعض وحركيهم بس شوي ، إلين ما تقريبا ينخلط بالعربي
عادي يكون فيه شوي كتل طحين بتروح بعدين بس أهم شي لا تخلطين كثير ولا بيجيك ناشف كنه خبز.
الحين أضيفي عليهم الشكولاته الباقية و إخلطي بس شوي لا تنسين بس شوي لا تخلطين كثير أبدا.
الحين صبيها في صحون مفن ( موب ورق كب كيك ) لا صحن حديد حق المفن أو سيليكون .
طبعا لو كان سيليكون ما يحتاج تدهنينه بزيت بس الحديد يفضل تدهنينة بزيت .
حاولي إنك توزعينها بالتساوي على الصحون عشان تنطبخ بنفس الوقت .
الحين حطي المفن في الفرن و بعدين إرفعي حرارة الفرن ل ٤٠٠ فهرنهايت لمدة١٠دقايق تقريبا ،
بعدين رجعي الحرارة ل ٣٧٥ وكملي طبخ حوالي ١٠ دقايق زود .
سويي إختبار العود إذا شفتي إنها قربت لأن موب شرط تخلص في نفس الوقت اللي أنا حاط هنا .




الباوند كيك

• كوبين طحين منخول
• ١/٢ملعقة صغيرة بيكنج باودر
• رشة ملح
• أصبعين زبدة دافيه بس موب ذايبة
• كوب ونص سكر
• ٣بيضات على حرارة الغرفة
• بشر ليمون
• رشة فانيلا
• ١/٢كوب حليب على حرارة الغرفة

** طبعا كل شي بالأكواب المعيارية !
سخني الفرن على ٣٥٠ من تحت .
أدهني صينية كيك حقت الباوند كي العادية اللي تجي مستطيلة بزبدة و رشيها بطحين وشيلي الطحين الزايد.
أخفقي الزبدة والسكر إلين يصير كريمي حوالي ٥ دقايق بالخلاط اليدوي أو ٣ بالخلاطات الكبيرة . ب
عدين أضيفي البيض وحده وحده بعدين قشر الليمون و الفانيلا .
بعدين نزلي السرعة وأضيفي الطحين و الحليب بالتدرج وعلى دفعات متتالية ..
إن شاء الله فهمتي .. يعني قصدي تحطين دفعة طحين بعدين شوي حليب بعدين طحين بعدين حليب
وكذا حوالي ثلاث دفعات بالكثير و أهم شي تبدأين وتنتهين بطحين... و طبعا بدون ما أقولك لا تزودين خلط أبداأبدا ..
صبي الخليط في الصينية بعدين أخبزيها في الفرن إلين يطلع عود منها شبه نظيف يعني مع شوي فتات كيك حوالي ساعة إلى ساعة وربع .
خليها تبرد على شبك بعدين أقلبيها وخليها تكمل تبرد.
وبس هذي الباوند كيك.




كيكة الشوكولاته

• 2وربع كوب طحين أبيض
• ٢وربع كوب سكر
• ملعقة شاي بيكنج باودر
• ١وثلاث أرباع ملعقة بيكنج صودا
• ملعقة صغيرة وشوي ملح
• كوب شكولاته بودرة
• ٣ بيضات
• ملعقة كبيرة فانيلا*
• ١/٢كوب + ملعقتين كبار زيت نباتي
• ١وربع كوب حليب كامل الدسم
• ١وربع كوب قهوة قوية

عاد إن شاء الله ما يحتاج أشرحلك ..... على ٣٥٠ طريقة المفن ......
يعني حرارة الفرن ٣٥٠ . أنخلي المواد الجامدة ، أخلطي السايلة مع بعض،
بعدين إخلطيهم على بعض و أخلطي شوي بس إلين ينخلطون .
حطيها في صينية مدهونة وعالفرن ٤٠ - ٤٥ دقيقة تقريبا أو إلين ما العود يطلع ناشف ..
خليها تبرد طبعا ربع ساعة تقريبا .




كيكة الجزر

• كوبين ونص طحين أبيض + شوي عشان الصينيه
• حوالي ٣٤٠ جم جزر مبشور على حجم وسط يعني موب أصغر فتحة في المبشرة ولا أكبر وحدة
• تجنبا للمشاكل الله يعينك عاد أوزني الجزر.
• ملعقة شاهي بيكنج صودا
• ملعقة شاهي بيكنج باودر
• ١/٤ملعقة صغيرة قرفة مطحونة
• ١/٤ملعقة صغيرة جوزة طيب مطحون
• ١/٤ملعقةصغيرة allspice إذا لقيتيه مدري وش إسمه بالعربي
• ١/٢ملعقة صغيرة ملح
• كوب وثلث سكر أبيض عادي
• ١/٤كوب مضغوط سكر بني غامق
• ٣بيضات
• حوالي ١٧٠ جم زبادي
• حوالي ١٧٠ جم زيت

للخلطة اللي فوق :

• ٢٣٠جم فيلادلفيا
• ٤ملاعق زبدة دافية
• ملعقة صغيرة فانيلا
• كوبين سكر مطحونه

سختي الفرن على٣٥٠ فهرنهايت
أول شي إدهني صينية الفرن بزبدة بعدين رشيها بطحين وشيلي الزايد ،
حجم الصينية يفضل تكون دائرية قطرها حوالي ٩ إنش.
أنخلي الموادالجامدة مع بعض ( بدون السكر طبعا السكر يعتبر سايل في الحلويات ) ،
وبعدين حطيهاعالجزر المبشور و أخلطيها شوي بيدك.
الحين حطي المواد السايلة في خلاط معدا الزيت في خلاط و أخلطيهم و بنفس الوقت
صبي الزيت من الفتحة اللي فوق .الهدف هنا
إنك تخلطين المواد مع بعض صح بحيث إنك ما تضطرين تخلطين كثير في الخطوة الجاية وهذا اللي يخلي كيك كثيييييييييييير ناشف.
الحين صبي المواد السايلة على الجامدة و أخلطي بملعقة خشب
حوالي ١٠ ثواني لا أكثر !!!!! حتى لو بقى شوي قطع عادي تروح في الفرن .
صبيها في صينية الفرن وعالفرن حوالي ٤٥ دقيقة بعد ٤٥دقيقة نزلي الحرارة ل ٣٢٥
و أطبخيها زود ٢٠ دقيقة .
طلعيها من الفرن وخليها تبرد يمكن ربع ساعة بعدين طلعيها من القالب وخليها تكمل تبرد
وبنفس الوقت سويي الخلطة اللي فوقها
أخلطي كل المواد ما عدا السكر بخلاط يدوي ، بعد ماينخلطون زين حطي السكر
و أخلطي زييييين . وبس ، خليه في الثلاجة ١٥ دقيقة بعدين زييني الكيك فيه .




يتبع●●◄

[ضيفة]

التراميسو

• حوالي كوب إسبريسو مخففة بكوب مويه ،
• أنا لأني أمووووت في شي إسمه إسبريسو أسويها بكوبين بس أنتي ورغبتك عاد
• مخلوط معاها ملعقة كبيرة سكر .
• ١/٢كوب سكر
• 4صفارات بيض
• نص كيلو جبن ماسكاربوني
• كوب قشطة خفق باااااااااااااارد
• حوالي ٣٦ حبة أصابع السيدة أو الليدي فينجر
• قشر برتقال أو فانيلا أو حتى شوي إسبريسو ( إختياري)

أول شي في حمام مائي أخفقي البيض و السكر بخلاط يدوي أو باليد
إلين ما يتضاعف حجمه حوالي ٣ مرات (حوالي ٥ - ٨ دقايق).
لو تبين حطي النكهات اللي تبين الحين ، إستخدمي فانيلا أوبرتقال
لو تحبين بس أنا زي ماقلت أعشق القهوة عشان كذا أستخدم يمكن
شوت إسبريسو مع البيض و السكر.بعدين شيليها من الحمام و أخلطي معاها المسكربوني.
الحين في صحن معدني نظيف وبارد ومضرب خلاط بعد نظيييييييف
أخفقي القشطة إلين ما تثبت وتوصل مرحلة منقار الطير.
الحين أخلطي الإثنين مع بعض شوي شوي.
الحين جيبي صينية قزاز أو عاد أي شي أنتي وفنك في التزيين تبين أكواب، تبين صينية وحده كبيرة اللي تبين .
أنا أستخدم صينية بايركس كبيرة و منها أستخدم قالب دائري
و أقطعها على شكل دوائر قبل التقديم يطلع شكلها خرااااافي ، بس زي ماقلت أنتي وفنك.
غطسي البسكوت في الإسبريسو غمسه سريييييييعة ،راح تشرب القهوة بسرعة وتتفتت
فأنتبهي إنك تغمسنها كثير.رصيها في الصينية بعدين صبي فوقها نص الخلطة
بعدين باقي البسكوت و باقي الخلطة فوقها .
رشي فوقها شكولاته بودرة للتزيين وطبعا ما يحتاج أقولك زينيها على كيفك .
حطيها في الثلاجة ٦ ساعات على الأقل ، تقعد في الثلاجة إلى يومين .
هذي طريقة تقليدية جدا .لو تبين تعديل حلو قد سويته صدقيني جربيه مرة راح يعجبك .
أخلطي مع الزابيوني شكولاته بيضاء جدا لذيذة مع القهوة.




البان كيك

• كوبين طحين متعدد الإستخدامات منخولة
• ملعقتين كبار بيكنج باودر
• ملعقتين كبار سكر
• ١/٢ملعقة شاهي ملح
• كوبين لبن(صدقيني هذا للي يسوي كل الفرق)
• بيضتين
• ملعقتين كبار زبدة أو زيت

أول شي إنخلي المواد الجامدة مع بعض
طبعا لو تبغين تقدرين تحطينها في كيس و تحفظينها لوقت ثاني
وبكذا تسوين زي البانكيك حق السوبرماركت ، يعني كيس خلطة وتزيدين عليه المواد السايلة وبس.
أخلطي المواد السايلة في صحن.بعدين في صحن خلط حطي المواد الجامدة في جهة
من الصحن و حطي الموادالسايلة في الجهة الثانيةبعدين إبدي إخلطي إلين ما تلاقينها تقريبا إنخلطت .
لاحظي إني قلت تقريبا إنخلطت زي ما أقول كل مرة لا تخلطينها كثير عشان ما تسير ناشفة ،
إخلطيها شوي شوي إلين ما كل الطحين يختفي تقريبا يعني عادي تلاقين كتل طحين
لاتحطين حيلك فيها هذي بتختفي في الخطوة اللي بعدها .
تذكري التفاصيل الصغيرة هي اللي ترا تسوي كل الفرق . الحين خلي الخليط يرتاح شوي ٥ دقايق.
بعد ٥ دقايق بتلاقين الخليط صار شكله غريب، صدق والله شكله كنه رغوة صابون بس ماعليك.
الحين سخني الصاج لو عندك أو مقلة عادية على حرارة وسط
و بعد ما تحتر إدهنيها بشوي زيت .الحين بمغرفة صبي حوالي مغرفة من الخليط على المقلة في مكان واحد ( عشان تجيك دائرية )
و إنتظري إلين تطلع فقاعات للسطح بعدين إقلبيها.
ملاحظة : إنتبهي لا تخلطين الخليط كثير بعد مايرتاح مهم جدا إن الهوا اللي جوا يبقى جوا.
البانكيك ياخذ حوالي ٣ - ٥دقايق عشان يستوي . قدميها مع شيرة البانكيك ( طبعا النوع الأصلي ) و زبدة .
لو تحبين قدميها بعد مع موز و بيكان محمص أو لوز عادي بعد ينفع .



الوافل

• ٤ أكواب طحين ونص
• ملعقتين شاهي بيكنج صودا
• 4 ملاعق شاهي بيكنج باودر
• ملعقتين شاهي ملح
• 3 ملاعق كبيرة سكر
• ٢/٣ كوب زبدة سايحة ( حوالي أصبع ونص)
• ٥ بيضات مخلوطة شوي
• 3 وربع كوب حليب أوأكثر لو تبين تكون خفيفة مرررة

أنخلي المواد الصلبة و صبي عليها السايلة و أخلطي إلين تسير ناعمة بس .....
سخني مكينة الوافل على أحر شي و أدهنيها لو كانت تحتاج دهن
صبي شوي من الخليط في المكينة قفليها بعدين إقلبي المكينة عشان توزعين الخلطة صح
خليها تطبخ بعدين شيلي الوافل من المكينة وقدميها .





الكريب

• بيضتين
• ٣/٤ كوب حليب
• ١/٢كوب مويه
• كوب طحين
• ٣ملاعق زبدة سايحة
• ملعقتين سكر
• رشة ملح

في خلاط أخلطي المواد مع بعض بسسسسس إنتبهي لا تعلقين على الزر
لأ إضغطي ضغطة ووقفي وبعدين الضغطة اللي بعدها ١٠ ضغطات لا أكثر ...
راح تلاقين كتل طحين !! ماعليك منها بتروح . الطحين ياخذ وقت عشان يشرب المويه.
حطي الخليط في الثلاجة على الأقل ساعة إلي ٤٨ ساعة .
الحين سخني مقلة و بعد ما تحتر أدهنيها بزبدة و حطي شوي من الخليط
يكفي إنه يغطي المقلة بس لا أكثر ولا أقل .
يمكن أول كم وحده تكون كبيرة زيادة أو صغيرة بس عادي بتعرفين كم تحطين بعدين .
بعد ما تحطين الخليط حركي المقلة عشان توزعين الخليط عليها
خليها تطبخ إلين تبدأ تقلب بنية من تحت بعدين إقلبيها.
لو تبين كريب مالح شيلي السكر.يمديك تفرزينها ترى وتسخنينها بالفرن أو الميكروييف .




الكوكيز

• أول شي تسوينه هو إنك تذوبين أصبع ونص زبدة بعدين تخلينها ترجع تجمد مرة ثانية برا الثلاجة !
• لا تستخدمينها وهي سايلةولا تحطينها في الثلاجة يمكن تاخذ شوي وقت .
• ٣/٤كوب سكر بني ( مهم هنا ما ينفع يتبدل)
• ١/٢كوب سكر أبيض
• ملعقة كبيرة فانيلا سايلة
• بيضة وصفار بيضة
• كوبين طحين
• ١/٢ملعقة شاهي بيكنج صودا .
• ١/٢ملعقة شاهي ملح

كوب إلى كوبين هيرشي أنا أستخدم كوب ونص
سخني الفرن على ٣٢٥ أول شي أخلطي الزبدة و السكر الأبيض و البني إلين ينفش شوي .
بعدين حطي الفانيلا والبيض.
بعدين أنخلي عليهم الطحين و البيكنج صودا و الملح و أخلطي إلين يتجانس بس لا تكثرين خلط هنا.
بعدين آخر شي بالملعقة أخلطي الهيرشي.
شكليها على شكل قطع متساويه ينفع لو تبين أسهل بحقت الإسكريم
بعدين حطيها فوق ورق زبدة وخلي بينها مسافات
الحين حطي الصينية في الثلاجة حوالي ربع ساعة وبعدين على الفرن حوالي ١٣ - ١٥ دقيقة
أو إلين ما تبدأ الأطراف تتشقر .





الجوزية

المقادير بالجرام الله يعينك عاد ... بس ترى وزن المقادير ما ياخذ دقيقة بالضبط دقيقة ....

• ٢٢٥جرام زبده على حرارة الغرفة
• ٢٢٥جرام طحين
• ٢٢٥جرام سكر
• ملعقة فانيلا
• ملعقتين شاهي بيكنج باودر
• رشة ملح
• ٤بيضات

هذي الوصفة الأساسية يمديك تعدلينها لو تبين ، مثلا حطي قشر برتقال أو ليمون .
أو بدلي جزأ من الطحين ( بالوزن ) بجزأ لوز مطحون أو أي مكسرات مطحونه مثل عين الجمل مثلا . يمديك حتى تبدلين شوي بشكولاته.
أول شي إنخلي المواد الجافة مع بعض بدون السكر طبعا ...بعدين سخني الجهاز.
بعدين أخلطي السكر و الزبده في خلاط كهرب إلين يسير كريمي ،
بعدين أخلطي الفانيلا و القشر لوكنتي تبين تستخدمين .
الحين أخلطي معاهم بيضتين و أخلطيهم إلين يتجانسون بعدين نزلي السرعة على أقل شي
وحطي نص الطحين بعدين عيدي نفس العمليه ، حطي باقي البيض بعدين باقي الطحين
و أخلطي .الحين يا تصبينها بكيس كريمة وهو أفضل شي صراحة . أو عادي زي ما تسوين بالعاده .
لو القالب يحتاج دهن أدهنيه بعدين صبي الخلطة إلين٢/٣الإرتقاع تقريبا.
بس بعدين أخبزيها عادي. الطريقة هذي ناس كثير مدحوها وكنت ناوي أجربها بس إلا يومك ما جربتها .
جربيها وقوليلي وش رايك .






يتبع●●◄

[ضيفة]

فطيرة الخوخ (Peach Pie)

• كوبين ونص طحين أبيض لجميع الإستخدامات
• ٥ ملاعق صغيرة سكر
• رشة ملح
• ١٠ملاعق كبيرة زبدة ( أصبع و ربع ) مقطعه مربعات حجمها حوالي صانتي بااااااارده هنا السر ترى.
• ٣/٤كوب + ملعقتين كبار لبن (موب حليب ولا زبادي لبن عادي ) بااااااااارد

للحشوة :

• ٣/٤كوب + ملعقة كبيرة سكر
• ١/٤كوب طحين
• ملعقة ونص كبيرة ليمون
• نص ملعقة صغيرة قرفة
• ربع ملعقة صغيرة هيل
• كيلوين خوخ طازج
• ملعقتين زبدة باردة مقطعه صغار
• بيضه مخلوطه شوي .

في خلاط مولينكس أخلطي الطحين و السكر و الملح ..
بعدين أضيفي الزبدة و أخلطي على شكل دفعات قصيرة جدا ...
يعني لا تخلينه يشتغل إلين كل شي ينطحن !!
لأ بس ضغطه بعدين توقفين بعدين ضغطه ثانيه وكذا إلين يصير حجم الزبدة تقريبا حجم حبة البازلاء
بعدين وقفي... تاخذ حوالي ٢٥ ضغطه .بعدين أضيفي الللبن وأخلطي شوي إلين تكون كتل رطبة
جمعي العجينة بيدك و بعدين أقسميها نصين واحد أكبر من الثاني عشان واحد فوق و الثاني تحت ..
بعدين لفيها بنايلون وحطيها في الثلاجة ساعة كاملة أو يوم بعد أفضل .


للحشوة:

أخلطي ٣/٤ كوب السكر + الطحين + الليمون + البهارات في صحن
بعدين أطبخي الخوخ في مويه مغليه ٣٠ ثانية بالكثير،
بعدين أنقليها لمويه بااااااااارده مع ثلج عشان توقفين الطبخ وعشان تقشرينها بسهولة .
بعدين أفركي القشر بيدك وبيطلع معك بسهوله ، أقطعيه بالنص
وشيلي البذرة اللي في النص بعدين خليه يبرد .
قطعي الخوخ إلى قطع وحطيها على الخلطة اللي سويناها فوق إلين تنزل عصارته
حوالي ٢٠ دقيقة . مع التحريك كل شوي .
سخني الفرن ل ٤٠٠فهرنهايت من تحت .. أفردي العجينة الكبيرة
على سطح مرشوش بشوي طحين إلين توصل حوالي ١٢ - ١٣ إنش،
بعدين حطيها في صحن حق الباي بقطر حوالي ٩ إنش .
قصي الأطراف الزايدة بس بقي ٣/٤ إنش تقريبا .
صبي الخليط حق الخوخ بعدين قطعي باقي الزبدة عليها في أماكن متفرقة
أفردي العجينة الثانيه إلين تصير ١٢ إنش بعدين حطيها فوق العجينة الأولى .
الحين عشان الشكل الحلو .. لصقي الزايد من الطبقة اللي تحت مع الطبقة اللي فوق
بإنك تضغطينها مع بعض .
بعدين أطويها على تحت ولصقيها في أسفلها . عشان تصير زي الحبل تقريبا حولين الباي
إن شاء الله فهمتي وش أقصد .
الحين أقطعي كم فتحة في سقف الباي عشان ما تنفجر في الفرن
بس مجرد فتحات صغيرة تكفي . بعدين أمسحيها بالبيض ورشيها بالسكر الباقي .
حطيها في الفرن في وسط الفرن تماما حوالي ٥٠ دقيقة .
حطي صينية في الرف اللي تحتها أو حتى قصدير عشان يمسك أي شي يطيح منها .
لو لقيتي الحشوة تغلي داخل العجينة عادي وطبيعي تلاقين أشياء تطيح منها ...
لو لقيتي الوجه تحمر أكثر من اللازم غطيه بورق قصدير بس حطيه عالوجه يعني لا تلصقينه .
خليها تبرد حوالي ساعة بعدين قدميها مع إسكريم لو تحبين أو لحالها
وتراني إلى يومك والله ما سويتها لأني أنتظر وقت الخوخ اللي هو الحين ..
لو جربتيها قوليلي كيف كانت ...




[ حشوات التارت ]


حشوة الليمون بالكريما هذي وصفة جدا مشهورة .

• كوب سكر
• قشر ليمونتين
• ١/٤كوب مويه
• ٣/٤كوب قشطة خفق
• رشة ملح
• ٥ بيضات
• ١/٢كوب عصير ليمون

أول شي تسوين العجينة الحلوة في صينية ٩ - ١٢ إنش بالكثير .
حطي السكر والموية وقشر الليمون في قدر وخليه يغلي ٥ دقايق ، نزلي الحرارة
بعدين حطي القشطة و الملح (لا تخلينه يغلي !!!! إنتبهي عندك ليمون و حليب).
أخلطي البيض شوي ، بعدين أخلطي خليط السكر و القشر على البيض شوي شوي.
بعدين ضيفي عليهم العصير وصفي الخليط .
الحين نزلي حرارة الفرن ل ٣٢٥ ، و طبعا تكونين مسوية القشرة
صبي الكسترد في القشرة و حطيها في الفرن إلين ما تجمد الأطراف
بس يبقى الوسط يهز شوي(٢٥ - ٣٠دقيقة) ، طلعيها من الفرن وخليها تبرد تماما .



حشوة البيكان

• ٣بيضات
• ١/٢كوب سكر بني غامق
• ٣/٤كوب سكر ذرة أو شراب ذرة
• ٣ملاعق زبدة ذايبة
• ملعقة فانيلا
• رشة ملح
• كوبين بيكان

سخني الفرن على ٣٧٥ بعدين
أخلطي البيض والسكر بخلاط كهربائي بعدين حطي شراب الذرة و الملح
و الفانيلا آخر شي أخلطي معاهم البيكان .
وبس حطيها في القشرة الجاهزة بعدين في الفرن إلين تجمد حوالي ٢٥ دقيقة
خليها تبرد زيييين بعدين كليها .




فروستنج جوز الهند

• علبتين حليب جوز هند تخلينهم يغلون غليه خفييييفة إلين يصيرون كوب ونص تقريبا حوال٢٥- ٣٠دقيقة بعدين تاخذين من الخليط هذا ١/٣ كوب بس ....
• أصبعين زبده دافيه
• كوبين ونص سكر بودرة
• عود فانيلا لو عندك أو فانيلا سايلة لوتبين .
• رشة ملح

أخلطي الزبده بخلاط على سرعة عاليه إلين تنفش بعدين أضيفي السكر
و الحليب حق جوز الهند... وباقي الأغراض كلها وأخلطيهم إلين ينخلطون بس !!





البرالاين

البارالاين عبارة عن مكسرات مغطية بكاراميل بس !! الحلو فيه
إنه لو خلطتيه مع الإسكريم مع الوقت الكاراميل الناشف هذايبدأ يذوب في الإسكريم ويكون لك خطوط
من الكاراميل السايل + الكارميل الناشف المقرمش + المكسرات = طعم رهيييييييييييب.
طريقة البارالاين هي إنك أول شي تحمصين المكسرات حقتك لو تبين طبعا موب ضروريه هذي العملية .
بعدين تسوين كاراميل عادي سكر في مقلة ثقيلة و تحولينه كاراميل
بعدين تقطعين المكسرات للحجم اللي تبينها وتحطينها على الكراميل الحار !!!
وبعدين علطوووووول تصبينها على صينية فرن
مبطنة بورق زبده أو parchment عشان ما تلصق.
طبعا راح يجمد في لحظتها عشان كذا اللي تسوينه عشان تسوين أنحف طبقة ممكنه
هو إنك تمسكين صينية الفرن بشكل شبه عامودي
وتصبين الكاراميل فوق طبعا هو راح ينزل وينتشر بسرعة جهة الأرض بس خليه وهو بيجمد
يمديك طبعا تستخدمين ملعقة مدهونه بزيت عشان توزعيه بس الجاذبيه أسهل.








تم بحمد الله

إن من ترحل به رياح الواقع لا تعود به بحور الحنين