ااكتر شي يضايقك في غرفتك ...

[exlex]

مرحبا يابنات غرت من صاحبتي one قطة شمواه وقلت الا والا انزل موضوع

اليوم وانا جالسة ارتب غرفتي انواع الحوسة اكتشفت في اشياء مالها داعي مرة
احتفظ بعلب كل شي اشتريه احب اخلي كل شي بكرتونة ما ادري من فين جبت هادي العادة
واليوم عاد خرجت كل شي في الدولاب ..

مع اني كل فترة ارفع الغرفة واخرج الخنابيق ما الاحظ ان الكراتين يبغالها رمي
لو اودي كراتيني لمصانع اعادة التدوير يعطوني هدية كرتون كبير عشان الم فيه الخنابيق القادمة
وتراني اهون من اختي كانت تلم كل شي كل شي ماتتتخيلو كيف عندها عشق للقرابيع
عادي ترفع مرة وحدة في الشهر والقرنبع جالسة ما ادري ايش الجمال اللي في الموضوع
يعني لو كل شي بكرتونه نقول ممكن لكن كدا اشياء ماتتوصف

يلا عاد كل وحدة تقول لنا ايش عاداتها في غرفتها ولو معاها احد تقول ايش الشي اللي يضايقها وماتستحمله ابدا ...

ما استحمل الخنبقة وعدم الترتيب ابدا ابدا حتى لو مشغولة لازم ارتب الدولاب باقي الاشياء تهون ...
وياويل اللي يقربع غرفتي

[ورد تميم]

يوووووووه موب انتي اللي تجمعين كراتين

هههههههههههه
انا قبل ماسافر احب ارتب غرفتي الواحد مايعرف وش يصير
ولقيت كراتين يااااساتر تخيلي جوالات رميتها او ضاعت ومحتفظة بكراتينها
ولما رجعت من السفر لقيت غرفتي خفيفخ وحلوة
يعني اناااامثلك
موضوعك حلو وتلاقي كل شموائيه راح اترتب غرفتها الليله

[BlueBS ’’]

كان عندي كم مشوار ,, خلصتهم وجيت ..
عجبتني حركة انك تحطي كل شي بكرتونته .. احس ما بتتقربع معاك الدنيا
بس اكيد كل ما خلصتي من شي ارميه .. ولا حنقول : الله يرحمك .
انا ,,, والعياذ بالله من كلمة انا .
هههههههههههه
الا موضوع الترتيب هذا ,, لا تكلموني فيه ..
قولي مثلا اني ارتب دولابي الصبح ,, لما اجي المغرب الاقيه اتقربع مرة ثانية
ما ادري ليه ؟؟
وكل ما ارتبه اخرج كوم اغراض ,, ويصير حلو .. لما يجي ميعاد التنظيف الثاني
تلاقيني اخرج كومة اغراض ثانية
وهذا هو الحال معي ..
اختي توتة ,, ماشاءالله مرتبة على طول ..
بس على قولتها //
: انت من يوم ما قعدتي في البيت معايا صرت مهملة زيّك ..
: وانا اش ذنبي بالله ؟؟!

حلو موضوعك .. ولكنني من مؤيدي الحرية ..
ما انكر انه مع الترتيب ,, ماراح تضيع اشيائك
انا عندي كذا صندوق .. كل شي احط فيه قرنبع من نوع معين عشان كده ما تضييع اشيائي كثير
الا الاوراق .. وصفات الطبخ .. ملاحظاتي ,, مذكراتي ..
هذه دايما دايما اضيعها P: وتونا اش نقول !!
موضوعك حلو يا قميلة .. مستنية اقرا ردود البنات بكل حماس ,,


LOve ||~

[ڪَـلي جـنـۈטּ ≈㋡]

~
تدرين انـآآآ أكثر شي يقهرني في حجرتي ان
الدريشة في طوفة و المكيف في طوفة
يعني صـآيرة الغرفة بس جدآرين اقدر اتحكم فيهم
><
مشكورة ع الموضوع الحلو يَ عسسل

[klassika]

شفت موضوعك وانا داخله على ملف rosered

أنا من عشاق النظافة أولاً وبعده يجي الترتيب..
يعني ممكن تشوفين دولاب ملابسي يتكركب بسرعه
بس رحيتة تفوح صابون و مسك

ما أستحمل أبداً أشم ريحة مو زينه بأغراضي..أو ألاقي في غرفتي غبار..

بالنسبه للترتيب.. زي ما قالت بلو ايرس
دولابي يتكركب بسرعه ..ينرفزنيييي..
يمكن لان اغراضي كثيرة..وأصر اني أحتفظ فيها ..

عندي انواع وأنواع من الكريمات وزيوت الشعر
ساعات أطالع فيها وأقول ياربي ليش ما ارميها ماخذه مساحة..بس بيجيها يوم وبتنرمي!

تعودت أرتب دولابي شهرياً.. وأغسل واعطر المفارش اللي تحت الملابس
ودروج الميك اب أشيك عليها واحتفظ بكل شي في مقالم
و علب..
ولقيت حركة حلوه للشرابات..
شفت زوجي عنده صندوق في دولابه ..حاطه بالرف اللي تحت وحاط شراباته فيه
وأنا عندي كمية كبيرة من الكيلونات واللقينقز و الشرابات
فأخذتلي كرتونه وجلدتها وحطيتها بالرف السفلي..
..هالحركه أفضل من الدرج برأييي ..سهلت علي الوصل للي ابيه بسرعه.. حبيتها

بالنسبة للكراتين أحتفظ فيها كلها تحت السرير..للحاجه..هههه مو بس انتي
متى بتجي هالحاجه الله اعلم

وسلامتك هذا مافي جعبتي..

[One]

هلا هلا احم احم ميآآو لووول
انا غرفتي كبيره مشالله و قاصه على بيتنا و ماخذه الغرفه الرئيسيه , حاليا انا مُشرده و قاعده ف الصاله قرابيعي و قشي ف الصاله الله لا يوريكم !
غرفتي الجميله احبها اولا لانها كبيره و بما انو اكثر شي يضايقني مكان السرير صاير بروحه مسكين و جنبو كرسي طويل ف ما اقدر اغيره لو حبيت آغير الديكور ! يعني الكبت و التسريحه ثآبتنين ما يتحركون و قريبا رح افتك من هالمعاناه لانو خلال هلأسبوع رح اسكن في غرفتي الجديده و راح انزل صورها احم احم

طبعا انا اكره شي عندي العفسه حتى قبلل لا ادرس لاااااازم تكون مرتبه ولا غبره وحده موجوده كل شي مرتب و نظيف و دقيق <<الله يعين اللي بياآخذني لووول
احم احم حآليا رحا استغل مساحده صغيره من غرفتي و اسوي فيها ستيدو صوغنن للتصوير و هالشغلات و انشالله يزبط

احم احم مشكوره ع الموضوع و اخيرا حد فهمني لووول

[exactly]

شبيهتي هههههههههه أجل غرتي ياحبيلك ,دايم غيري اجل دام بنشوف هالطله

والله انا بالبيت نكتة تقريبـــا

يعني دولابي مثلا ..

صيدلية على جزامة على كريمات على اسلاك اول مره اشوفها على عطورات مستودع مو دولاب استغفر الله

والله اعصصب من هالشيء واقولهم خلاص برتبه ولا احد يحط اغراضه عندي فاهميين

واوكي ماشي الحال
بعد ساعتين بس بس ساعتين القى كل شيء بمكــانه انقههههههههههههههههههههههههههر

اف الله يعيني عاد بنغير الغرفه قريبا

واقولهم دولابي بمفتاح غصبن عنكم بصير عجيز مفتاحي وين مارحت معي ههههههههه

وصديقتي بالمدرسه كتبها بالدرج مرااا مرتبه بس انا مرره معفوسه على بعض وتهاوشني تقول رتبي علشان ماتضيع اوراقك ههههههه ياحبيلها

منتظره اشوف ردود البنات

[مرايم ~]

انا انسااانه مرررتببه مووووووت .. كلل شي
في غرفتي فمكانه ما يتحرك ..

يعني درج للامشاط والاستشوار
درج للاكسسوارات والشرايط
درج للعطور والكريمات
درج للاقلام والمساطر والبرايات
درج للكتب درج ..الخ

واااحب اقط الاغراض القديمه بين كل فترة وفترة اقط
ثيابي اقط جواتي {اتبرع يعني }

حتى العطور على طول ارمي العلبة اذا خلصت

تعرفين اعفس الغرفه لما يكون عندي حفله اجهز
واعفس الاكسسوارات ودرج الجواتي والمكياج

بس ماااا اطلع من البيت الا وانا ورجعه كل شي مكانه
ومرتبة سريري ومبخره الغرفه واطفي الليت
وافتح المكييف ههه ..

عشان لما ارجع من الحفله اكون تعبانه اغسل ويهي واغير ملابسي واااررقد ..


عموما ما فيه شي مظايقني
في الغرفه بس ودي لو ما عندي لمباات في الغرفه

لاني ااااكره الظوووء واتضايق لما حد يجي يفتح الليت حتى لو مو رااقده
احب اخلص شغلي على نور هااادي

حتى بليل الغرفه تكووون ظلااااام لما ارقد واروح اخذ فوطة وادعسها تحت
فتحت الباب ههه عشان الضوء ما يدخل يزززعجني
بطريقه مجننننوووونه ..

والباب بعد اااكره لما حد يدخل علي الغرفه ويطلع ويخليه مفتووح
ااااكرره اعد بس اصااارخ
صكرررووووووووا الباااااب .. حتى والله فكرت احط رداده مالت بيبان المطبخ بس خفت على المنظر العام

بس اسفه عالاطاله ..//

[عيـون المها]

تفتحي الموضوع دا لييييييييييييييه فتحتي على نفسك فاتوحة ليييييييييييه
شفتوا المدام الحلوة أم عيلين بريئين اللي تحتي
اعترفت بنفسها وأنا أشهد ولي حملة ان شاء الله عندها
بس خايفة من عيالها لما اجيب الكيس الأسود عشان قرابيعهم يقوموا يدخلوني فيه
وبكل أسى جيت لبنتها المفعوصة ام 4 سنين وقلت أتحاور معاها بشكل حضاري
وقلت لها ببرائة ::: ايش رأيك يا عسولة اجيب كيس ونلم الالعاب واللي ما تبغوه وما تلعبوا فيه نحطه في الكيس هذا
قالت لي ::: ايش حتسوي فيه
قلت لها :::وانا فرحانة وبكل ثقة نرميييه
قالت لي وبكل بروود وبنص عين لألألأ بالثلاثة
أنا ما أسمح لخالاتي يرموا العابي
ويحك يا روزا البنت شتمتني بالفصحى
لكن أنا لها تعبت وأنا اتكعبل بالالعاب حقهم غير قذائف الكرة اللي يرموها علي في راسي يقال يلعبوا ويمزحوا معاي يا ملحهم خخخخخخخخ بس احوبهم ..
ما علينا
أنا يا ستي ما احب العفش الكثيييير احب المساحات الفاضية يعني غرفتي تلاقي التسريحة مثلا فااااااااضية كل شي مرتب في الأدراج ما احب شي على التسريحة اشوف كثير في بيوتهم راصين العطورات وحتى المكياج كله فوقها على قد ما يكوون المنظر حلو بس انا يضاايقني ما ادري ليش
وحتى العاب عيالي مافي مجرد ما اشوفهم اهملوها وما يلعبوا فيها خلاص تترمي مستحيل اخلي شي حتى اني ماحطه في المخزن
غير كذا اكره العرايس الدباديب حتى لو اشتريتها لبناتي يلعبوا فيها ويرفعوها من وجهي في علبة العابهم لأني ما اتحمل منظرها وعارفين ايش حيكون مصيرها ..
وبس غير كذا الترتيب اول بأول يعني لازم حتصير كركبة من وقت للثاني بس لازم حملة كل أسبوع ويرجع كل شي مكانه
وعلى قول روزا اخاف يوم نيجي ونلاقيكي رامية العيال بأبوهم ههههه
<<للدرجة ذي حالتي صعبة
طلعت عقدي عليكم .....
يسلمووووووو يا حلوة على موضوعك الحلو

[Rose Heart]

سلام يا قمري ~
جيتي ع الجرح ... يا كثر ما اجمع قرابيع .. والدنيا تكون حايسة
المشكلة في أشياء ما استخدمها لكن قاعدة زي الهم
والمشكلة الأكبر اني على قولتك حتى الأشياء اللي ما لأمها داعي اجمعها في كراتين
كان دايم اختي الكبيرة تقولي صحيح بيتك نظيف ومرتب بس اشوف في قرابيع كثيرة لو اترمت حيطلع بيتك ارتب واحسن
( اختي الكبيرة ما شاء الله عليها عندها هوس رمي دايم اقترح عليها تفتح شركة تسميها شركة { كُبُّوا } )
المشكلة فيا أنا ما اعرف ارمي يعني لازم أحد على راسي يقولي ارمي دايم اقول لأخواتي شدّوا الهمة نبغى حملة كب ورمي ...
بس من شهر تقريباً قرأت كتاب نسيت والله المؤلفة ايش اسمها كانت تشرح كيف تعودي نفسك تتخلصي من الكراكيب اللي ما تستخدميها
وكيف ان القرار لازم يكون سريع يعني مثلا تمسكي الشي وتشوفي هل تستخدميه باستمرار خليه أو لك حوالي شهر أو أكثر ما استخدميه على طول ارميه بقرار سريع
وهذا اللي بدأت فعلا أطبقه وبدأت بغرفتي وكانت أختي عيون شاهدة ع البلاوي اللي رميتها
كان نفسها تسوي حفلة .. والدور جاي على بقية البيت ..
اكتشفت ان الرمي يعطي احساس بالحرية وكسر القيود
المصيبة الأكبر مو في غرفتي المشكلة الأكبر في غرفة أولادي وأختي عيون حالفة عليها
غرفتهم لسه فاضية يناموا عندي لأنهم مرة صغار لكن غرفتهم تطفح بالألعاب في كل مكان
ومو قادرة ارمي شي منها أشوفهم كلها يلعبوا فيها ... حتى لو على فترات متقطعة .. بس يلعبوا فيها كلها
والله يهديهم كل ما لميتها ودخلتها بداخل السلة والخيمة بكل بساطة في ثانية يقلبوهم ويكبوها كلها
طفشت لكن لنا عودة لها بإذن الله ...
موضوعك جميل وحلو نشوف رأي البنات ... يعطيك العافية

ويحك يا روزا البنت شتمتني بالفصحى

ههههههههههههههههههههههههههه
وتلوميني ليه ما ارمي خايفة انحط في الموقف البايخ دا ..
ما شاء الله عليكي وانا اشهد يا بنات ما تخلي شي في وجهها لا على التسريحة ولا على دواليب المطبخ كله مخفي لما تجي عندي نوعاً ما أحس بالبراح بعد ما تقش الأشياء اللي أكون حاططتها على دولاب المطبخ ... الله يعطيني هذي العادة يا رب